星期三上完堂後去咗銅鑼灣食晚飯，之後終於有機會去到 時代廣場 欣賞 LEGO 積木聖誕村啦！上次分享過 LEGO 響我成長中有咩意義，鍾意 LEGO 嘅我又點可以錯過呢次展出呢？
黎到 時代廣場，最顯眼嘅，一定係呢個企響鐘樓上面嘅巨型 Minifigure！佢仲手持 LEGO 旗幟！
今次嘅展出係以聖誕村莊為主題，露天廣場上都豎立咗好多積木建築物、積木裝飾、Minifigures。
不過我想首先講下夜空背景：好簡單嘅設計，幾粒星星、雪花，就已經好有夢幻嘅聖誕氣氛，正！
響背景下面仲放咗一架雪橇，係由三隻狗仔拖拉嘅；旁邊嘅兩個滑雪造型 Minifigure 好有型啊！
響聖誕村莊嘅旁邊有一個巨型雪人，就好似響到同咁多位遊客打招呼，歡迎佢地黎到聖誕村莊。
周圍都可以見到 LEGO 嘅標誌；我亦好鍾意整個聖誕村莊都掛滿不同顏色嘅小燈泡裝飾！
呢到放咗一架電車，車上嘅座位設計樸素，車頭企咗一隻 Minifigure，唔知佢係乘客定係司機呢？
聖誕村莊嘅商店有好多都係同食物有關：由專業蛋糕廚師打理嘅西餅店，為你送上精緻西餅！
食蛋糕嘅話，我鍾意食一啲佈滿白色忌廉嘅蛋糕；響西餅店入面見到呢個草莓蛋糕，好想食啊！
今次展出除咗係迎接聖誕節之外，同時亦慶祝 LEGO 八十週年，呢到都有一個好大個嘅生日蛋糕。
下一間商店就係糖果店，櫥窗上有好多一罐罐嘅糖啊！有果汁糖，又有士的糖，款式好齊全呢！
再過下一間就係餐廳，大廚會為你獻上聖誕火雞大餐！但係... 點解大廚個樣好似好兇狠咁嘅？
最後一間商店係我最喜歡嘅！就係玩具店啦！屋企有一隻小熊響到旋轉，店內就放咗多款玩具。其中，最吸引到我注意嘅就係嗰隻 Minifigure 毛公仔；Legoland 都有得賣，到時買一隻先！
聖誕村莊入面有好多由一粒粒積木砌成嘅圖畫，我覺得好得意！玩具店嘅積木圖畫就係一隻熊仔。
好啦！等我地上去二樓室內平台啦！一上到黎，就見到高空掛住咗五隻巨型聖誕老人 Minifigure！
地面都有展出聖誕老人 Minifigure；佢可以話係全場焦點，好多人都爭住同佢影相架！
平台呢到有一個 LEGO 模型，其實就係聖誕村莊嘅全貌，周圍嘅佈置都係呢個模型嘅放大版。
響聖誕村莊模型嘅正中心有一棵巨型聖誕樹，再放大之後會係點嘅呢？就係以下呢棵啦！
現場亦有展出另一種比較細棵啲嘅聖誕樹，我以前買 LEGO 積木套裝返屋企時都見過呢棵樹架！
下面就放咗一架電車，而平台就放咗一架蒸汽火車，都幾大架！睇下火車司機佢個樣幾威武！
後面嘅車卡上當然就有乘客啦！不過車卡上仲有一盒盒聖誕禮物，原來呢架火車都負責運送禮物！
平台仲有其餘聖誕村莊入面嘅建築物；呢間小屋嘅屋頂上面有一位天使，唔知呢間屋有咩用途呢？
屋內有好多積木！人地有波波池，唔通呢個係一個「積木池」？呢到仲有一幅薑餅人積木圖畫！
小屋都用上好多塊積木砌成，而每一塊巨型積木都印有 LEGO 字樣，做工好仔細架！
旁邊嘅小屋就放咗一隻隻 Minifigures，我特別鍾意法老王造型同埋吸血殭屍造型 Minifugure！
另一間小屋就係花店黎嘅，有一束束鮮花，亦都有積木圖畫，圖畫上面係一隻蜜蜂採花蜜嘅情景。
有顧客黎花店買花，同時間，仲有新郎新娘企咗響花店嘅附近，唔通今日係佢地兩個嘅大日子？
有另一個巨型雪人，但係同下面嗰個雪人相比之下，呢個係細隻少少嘅，造型上亦有少少唔同。佢頂帽上面有一片片雪花，其實平台呢到嘅不同佈置上都有呢啲雪花，又係一個細緻嘅設計。
聖誕村莊上擺放咗好多燈柱，響晚上為村莊上嘅每一個人帶來燈光，感覺上仲好溫暖添！
聖誕村莊嘅最後一座建築物，屋頂掛上咗 LEGO 旗幟，似乎呢間小屋有啲特別意義喎！
原來係一個關於 LEGO 八十年歷史嘅展覽，詳細講述 LEGO 響八十年間嘅演變，都幾值得睇下。
最後俾大家睇埋其他展出嘅巨型 Minifigures，有小丑造型、工人造型，亦有愛斯基摩人造型。
今次去欣賞呢個積木聖誕村，只係用手機隨意影下，都唔算睇得好細心，相信亦有野係忽略咗... 估唔到，淨係咁都已經逗留咗接近一個鐘！於是，我立即問自己，咁下年去美國 Legoland 點算？到時展出嘅 LEGO 一定比起呢到多好多，假如我每一個都要好仔細咁睇清楚，咪要用好多時間？！仲有遊樂設施、購物... 好驚唔夠時間！不過，都係到時先算，而家我繼續期待就可以啦，哈哈！
沒有留言:
張貼留言