迪士尼 方面並無為 Duffy迪士尼小熊 訂立一個生日日期，不過，今日係我地 Duffy家族 嘅生日啊！12月2日呢個日期係點訂出黎嘅呢？其實我係響2010年12月2日買咗屬於我嘅第一隻 Duffy 小熊；於是，我就將12月2日訂立為整個 Duffy家族 嘅生日，一次過幫屋企嘅每一隻 Duffy 慶祝生日！
上年我就冇特別響呢一日為佢地慶祝，因為我都唔記得咗佢地幾時生日，係前排睇返相片先知。轉眼間，我嘅 Duffy家族 已經兩歲生日啦！上年唔記得慶祝，唔緊要！今年就等我地大肆慶祝啦！
佢地生日喎！我當然要拎返我啲生日襟章出黎俾佢地戴下，影下相啦！三隻 Duffy 每人一個。講起生日襟章，早前見到樂園推出咗新款生日襟章，幾靚架！就黎生日嘅朋友，到時可以留意下。
至於 巨大Duffy，我就俾咗名牌佢戴；加埋聖誕領結，個樣好斯文，佢都有潛質可以做 演藝人員！
生日又點可以冇生日禮物呢？之前網友幫我響 東京迪士尼海洋 買嘅禮物，今日終於送咗俾佢地！
三隻 Duffy 都各有一份禮物，而且全部都係新嘅 Duffy 黎架！Duffy家族 而家已經有15位成員啦！我就送咗一隻 聖誕迷你Duffy 俾 大Duffy，佢地兩個著住一樣嘅聖誕服飾，好合襯！
無論係上衣、帽子、頸巾，都同 大Duffy 身上嘅服飾一樣架，啲服飾縮細咗就更顯精緻！
呢隻 聖誕迷你Duffy，身上有一個聖誕版嘅 Duffy 招牌；同時亦附上聖誕招牌以及 Duffy 故事冊。
至於來自 東京迪士尼海洋 嘅 大Duffy，佢嘅新朋友係一隻 手偶Duffy 黎嘅，同樣附上 Duffy 故事冊。
將手穿入去手偶入面，就可以幫 手偶Duffy 做出好多不同嘅表情！睇下佢幾可愛！
佢嘅身上亦都有一個 東京迪士尼海洋 Duffy 招牌。原來 Duffy家族入面有7位成員都係黎自東京架！
東京大Duffy 將手穿咗入 手偶Duffy 入面，睇黎佢都想幫 手偶Duffy 做啲得意嘅表情喎！
小Duffy 嘅新朋友就唔係黎自東京嘅，係響 香港迪士尼樂園 買嘅，就係 聖誕小Duffy啦！
佢地兩個嘅尺寸差唔多，不過 聖誕小Duffy 就再細隻少少；認識新朋友之後，佢地立即擁抱對方！
好啦！Duffy家族 嘅15位成員，一齊影張全家福啦！好多隻熊仔，場面好虛撼啊！
黎到晚上，係時候切蛋糕啦！今日去咗買個天使蛋糕返黎；又有得食佈滿忌廉嘅蛋糕，好開心！
嘩，好靚好大個啊！其實我本身想買天使mini，不過冇得賣，所以只好買個大嘅返黎啦...
等我幫個蛋糕粉飾下啦！加咗啲好好味嘅焦糖脆脆同埋一個生日快樂牌；仲響下面寫咗 Duffy。
點蠟燭啦！兩支蠟燭代表兩年嘅歲月；Duffy家族 嘅每一隻小熊都坐響梳化上，見證住夢幻嘅一刻。
派邊隻 Duffy 吹蠟燭好呢？丫！正所謂「新黎新豬肉」，就由 聖誕小Duffy 吹蠟燭啦！
蠟燭熄滅，飄起少量白煙；唔知 Duffy 佢地許咗咩願呢？會唔會係想有更多新朋友加入呢？哈哈！
切蛋糕就由 巨大Duffy 負責啦！佢咁大隻，睇黎係佢先至夠力切蛋糕，呢個任務非佢莫屬啦！
大家一齊食蛋糕，好味道！今日真係好開心！接著落黎就等我回顧一下關於每一隻 Duffy 嘅故事！
1) 大Duffy - 香港迪士尼樂園 - 2010年12月2日
2) 巨大Duffy - 香港迪士尼樂園 - 2011年6月15日
3) 迷你Duffy - 香港迪士尼樂園 - 2012年1月22日 - (右)
4) 小Duffy - 香港迪士尼樂園 - 2012年1月22日 - (左)
5) 東京大Duffy - 東京迪士尼海洋 - 2012年6月13日
6) 春日小Duffy - 東京迪士尼海洋 - 2012年6月13日 - (左)
7) 水手迷你Duffy - 東京迪士尼海洋 - 2012年6月13日
8) 春日迷你小Duffy - 東京迪士尼海洋 - 2012年6月13日 - (左)
9) 東京迷你小Duffy - 東京迪士尼海洋 - 2012年6月13日 - (右)
10) 掛袋Duffy - 香港迪士尼樂園 - 2012年7月14日
11) 南瓜小Duffy - 香港迪士尼樂園 - 2012年9月3日
12) 磁石Duffy - 香港迪士尼樂園 - 2012年9月29日
13) 聖誕迷你Duffy - 東京迪士尼海洋 - 2012年11月15日 - (右)
14) 手偶Duffy - 東京迪士尼海洋 - 2012年11月15日 - (左)
15) 聖誕小Duffy - 香港迪士尼樂園 - 2012年11月15日
都係嗰句啦，Duffy迪士尼小熊 響呢兩年間一直陪伴住我，為我帶來好多歡樂、幸運；相信佢地會繼續帶更多歡樂、幸運俾我，而我亦應承佢地，我會帶多啲新朋友返黎同佢地玩！哈！再次祝我嘅每一隻 Duffy 兩歲生日快樂！Happy 2nd birthday to my Duffy the Disney Bears!
沒有留言:
張貼留言