迷離莊園火車站 - 只限貨運?!

自從 迷離莊園 小路關閉後，想睇擴建進度冇之前咁方便，而家通常都只係響兩邊門口睇睇就算...  但假如有時間嘅話，都可以用另類方法睇嘅！為咗 迷離莊園，我再次乘坐 香港迪士尼樂園鐵路！好耐冇坐過啦...  印象中，灰熊山谷 開幕後都好似冇坐過，因為響小路睇都已經滿足到好奇心。

再睇返新版本嘅樂園地圖，迷離莊園 入面，鄰近鐵路嘅，分別有 奇幻庭園 以及一個小型火車站。

雖然的確係依鐵路而建成，但 迷離莊園火車站 最終都未能成為 香港迪士尼樂園鐵路 第三個車站。坐火車時偷拍到，火車站結構大致上都已經完成，不過月台就離鐵路比較遠，同時亦有設置欄杆；咁就代表 迷離莊園火車站 現階段都未被設計成一個可供乘客上落嘅車站...  實際上只係裝飾用途。





響 迷離莊園 嘅故事入面，主人 亨利爵士 會用鐵路將收藏品運返黎，呢個亦係火車站嘅存在價值。未來，唔知呢個貨運車站會唔會有機會變成一個客運車站呢？多一個車站可以有多一種體驗嘛！另外，坐火車嘅時候亦睇到 奇幻座園 嘅藝術品已經陸續抵達、開始上色，不過就影唔到相。>_<

要睇 迷離莊園 嘅進度又點止一個方法呢？而家就等我地升上半空，再用另一個角度睇清楚啦！登上 玩具兵團跳降傘，揀個靚位，響進行跳傘訓練嘅同時，仲可以睇到 迷離莊園 嘅真面目！點解我會話係真面目呢？因為用呢個高空角度黎睇，迷離莊園 龐大嘅後台設施即時表露無遺！





一開始見到呢個畫面，其實我好佩服 幻想工程師 嘅功力！因為佢地將整個後台設施收得好完美！之前行經 迷離莊園 小路，係完全睇唔到後台設施，我真係估唔到原來背後嘅後台建築物係咁大！但之後我又覺得，玩具兵團跳降傘 半空中嘅視野可以話係一個缺憾，破壞咗整個完美演出...  幻想工程師 好用心地將整個後台收埋，但呢個角度卻即時展示返，唔知仲有冇辦法可以補救呢...

最後又送上一張相片：玩降傘嘅時候，響 迷離大宅 旁邊隱約見到 灰熊山，睇落好似細座咗，哈！