相信各位響見到呢篇文章嘅標題嘅時候，心裡應該充滿疑問... 吓，咁快就到復活節咩？！事實上，前排響12月嗰陣，當我自己響樂園見到呢個糖果罐嘅時候，我嘅心中亦都充滿疑問... 點解園方可以響聖誕活動期間推出復活節商品嘅呢？我到呢一刻都解答唔到，只係覺得好搞笑...
時間不合，係呢個糖果罐其中一個古怪嘅地方，咁大家又知唔知道另一樣古怪嘅野係咩呢？其實，答案並唔係響個糖果罐上面；請睇睇以下呢張圖片，睇完之後，答案應該已經呼之欲出...
第一眼見到糖果罐上嘅圖畫就已經覺得好熟面口，好似響邊到見過咁... 所以我就繼續諗... 咦，呢架 Oswald 花車，咪係 東京迪士尼樂園 奇幻復活節巡遊 嗰架囉！點解會響香港出現嘅... 最後我就響網上搵返，原來呢幅圖正正就係 東京迪士尼樂園 奇幻復活節世界2011 嘅活動圖片！
不過... 又唔算一模一樣嘅，佢地有響幅圖整走返人地個 灰姑娘城堡，只係冇加返我地嗰個咁解... 知道呢個真相之後，我嘅心情都幾矛盾：一方面係因為呢個糖果罐真係整得幾靚，搞到我好想買；而另一方面係因為知道呢個罐嘅背後其實只係完全抄返黎，都幾無奈... 但係我最後都買咗返屋企...
暫且唔講幅圖嘅出處，等我睇下佢有咩特別啦！相比其他園內商品，我更喜歡呢幅圖嘅畫風！同時，圖中亦有一啲響 香港迪士尼樂園 比較少見嘅 迪士尼朋友，包括 Thumper、Miss Bunny！
至於糖果罐嘅後面，就畫有來自 東京迪士尼樂園 奇幻復活節巡遊 嘅四架花車，好有復活節色彩！
睇返上年響 東京迪士尼樂園 影嘅相，原來我當時有響巡遊期間親眼見過呢四架花車架！唉，又勾起我嘅傷心回憶... 因為嗰日落雨，園方就將呢個巡遊縮短演出，只係出咗四架花車... 不過又估唔到，我響現場睇嘅嗰四架花車，正正就係糖果罐上嗰四架！真係巧合，哈哈！
至於糖果罐嘅蓋，就印有 米奇、米妮 頭像；亦有Chocolate Crunch嘅字樣，不過個字體就...
各位樂園Fans應該都知道呢啲糖果罐入面嘅糖果，響呢七年間，黎黎去去都係得嗰幾種味道；今次值得一讚嘅係，佢地終於有新突破！除咗以往嘅牛奶朱古力脆脆之外，仲新增檸檬蜂蜜味！
唔知呢個糖果罐會唔會都令你又愛又恨呢？雖然明知係抄返黎，但實在係好靚，令人愛不釋手... 其實一直都知道佢地不時會「參考」一下人地嘅設計，但係幅圖完全同人地一樣，真係第一次見... 冇錯，抄咗之後，呢一款商品的確會好賣啲，但係其他商品呢？整體商品質素會有所提升咩？既然明知人地嘅商品設計得好，就唔好得個抄字，應該認真諗下人地嘅成功，檢視下自己嘅失敗。真係好矛盾，我個心就想佢進步，但同時亦對佢冇咩信心，所以短期內都係寧願佢抄人好過... =_=
既然講開 東京迪士尼樂園 奇幻復活節巡遊，順便送一首歌俾大家，就係呢個巡遊嘅背景音樂。響現場聽嗰陣覺得幾得意，可惜好快就冇咗印象... 幾個月前，我嘅好友再俾我聽，我即時愛上咗！呢首歌真係好有活力，令整個巡遊嘅吸引力大大提升！雖然有啲長，但係都熱烈推薦俾大家聽聽！
每次聽完呢首歌，我就會開心起黎，甚至連做野都可以做得快啲！總之就係整個人都充滿活力！希望我地所愛嘅 香港迪士尼樂園 都能夠好好向人地學習，一步一步將活力擴散至整個樂園！
沒有留言:
張貼留言