響劇院大門有一幅巨型畫作嘅投影，睇完演出之後，發現到原來畫作上嘅人物正正就係劇中角色！
開始演出前，劇院內顯示一幅世界地圖；莫非，水舞間 演出時將會帶領觀眾去到世界各地？
作為一個水上演出，最重要嘅，當然就係水池啦！呢個就係為 水舞間 特別設計嘅舞台！
唔似其他劇場表演，水舞間 允許觀眾響表演期間影相；既然我帶咗相機，咁我又影下啦，哈！表演開始，三支巨型船杆從水中升起；一眾表演者爬上船杆，再跳入水中，演出一系列水舞動作！
但係我今次就唔講故事內容啦，保留神秘感之餘，亦怕自己曲解故事內容，講錯咗就唔好啦！>_< 撇開故事，都仲有好多野可以講！響宣傳片入面，佢地都講到呢個演出涉及到好多高科技製作；例如，剛剛提及到嘅水池舞台，可以配合返表演嘅情節，迅速變成一個陸地舞台，非常厲害！
叫得做 水舞間，「水」固然係非常重要嘅元素，水池舞台已經好強，不過都仲有更多巧妙之處；演出嘅時候，水花從多個角度噴出，再配合色彩繽紛嘅燈光，做出幻化多端嘅水花效果。
不過 水舞間 又唔係無時無刻都同「水」有關嘅，表演都包含多個響空中、陸地進行嘅雜技環節。
其中一幕，演出者駕駛電單車，做出多個高難度動作，可以話係一個令我非常深刻嘅情節！
響美觀設計方面，佢地都做得非常出色！無論服飾、場景、佈景，都睇得出佢地花咗好多心機！
表演尾聲，男女主角終於可以響埋一齊；整個演出完結後，舞台繼續噴出小水柱，充滿幻麗感覺。
水舞間 響各方面都非常優秀，的確係一個值得欣賞嘅演出！惟一唔係咁滿意嘅，係門票價錢... 門票價錢唔算便宜，想坐一個比較好嘅位置的話，門票就更加貴；化唔化算，就視乎你點諗啦...
沒有留言:
張貼留言