恭喜發財! 喜氣洋洋的大年初一!

尋日大年初一，唔知大家做咗啲咩呢？拜年？逗利是？我全日只係做咗一樣野... 就係返工！不過，響返工之前，我同自己嘅 Duffy迪士尼小熊 一朝早就起咗身，響屋企同爸爸媽媽拜年！睇下佢地！個個都著住靚衫，握起雙手，做出恭賀嘅手勢！真係一班又乖又可愛嘅 Duffy 小熊！

巨大Duffy 著住咗新裝，而我亦響眾多 Duffy 小熊服飾入面揀咗兩套衫俾兩隻 大Duffy 響今日著。第一隻 大Duffy 熊仔著咗魔法師套裝，紅噹噹嘅魔法師長袍，好配合農曆新年嘅喜慶氣氛呢！來自東京嘅 大Duffy，我就揀咗中國裝俾佢著，令佢過呢個傳統中國節日嗰陣有一個完整體驗！

迷你Duffy 冇衫著，我亦冇特別為 小Duffy 換過另一件衫，但係佢地兩個都好開心咁拜年！另外，我都有俾新成員 情人節Duffy 一齊拜年，等佢可以感受一下我地 Duffy家族 嘅溫馨！

拜完年，我同一班小熊當然都有收穫啦！嘿嘿，係唔係覺得啲利是封好似有啲熟口熟面呢？因為係響樂園入面買嘅，上面都印有 金年有福 活動圖片！呢啲利是封係我指定要用嘅，哈哈！

過年點可以冇新年糕點呢？我好鍾意食年糕架，但係響新年先食到...  過咗成年終於再有得食！先前響樂園買咗一個新年全盒，黎到呢一日，裡面嘅糖果亦已經換成不同嘅傳統賀年食品！

雖然要趕住返工，冇響屋企留得太耐，但可以同 Duffy 一齊向爸媽拜年、食早餐，已經好開心！最後，響呢到祝各位「金」年有福、夢想成真，齊齊過一個既開心又奇妙嘅蛇年！^_^