首次參與 徽章交換同樂日, 熱鬧氣氛無間斷!

一連三日嘅 徽章交換同樂日2013 已經完滿結束啦！尋日係我第一次參與呢個咁有意義嘅活動！幻想世界 嘅角落突然變得非常熱鬧，果然係「同樂日」！而家就等我同大家分享下我所遇到嘅事！





現場有兩個遊戲俾各位徽章收藏家玩，仲有好多演藝員在場，響遊戲期間為大家打氣！兩個遊戲分別係拋金幣以及碌乒乓波，拋到、碌到去不同顏色位置，就可以獲得相對應嘅徽章！

以下就係我尋日嘅收穫，唔算好多，但已經好滿足！我亦幸運地獲得幾個新推出嘅 隱形米奇 徽章！怪獸公司月份系列，我得到二月份 Boo 徽章，但其實我想要九月多啲，遲啲又睇下有冇得交換先！





至於 米奇家族星期系列，我玩遊戲嗰陣得到星期四 Dale 徽章，之後我都換到 Chip 返黎儲齊一對！

玩遊戲都有其他不同嘅收穫，不過唔係咁啱心水，於是就去到園內各處，搵不同嘅演藝人員交換；呢一日換到兩個幾得意嘅徽章，一個係 Vinylmation Pooh 徽章，另一個就係可愛版 Dumbo 徽章！

最後呢個徽章來自一位朋友嘅，佢知道我想要 Pooh 名牌徽章，專登搵咗返黎同我交換！好多謝佢！





相比起隨機咁抽，我比較鍾意親自揀一啲自己喜歡嘅徽章，所以我每個遊戲都只係玩咗一次啫...  響現場冇逗留得太耐，但已經完全感受到嗰種熱鬧氣氛；所有徽章收藏家聚埋一齊，玩得好開心！好！黎緊呢年等我慢慢儲多啲徽章先！咁下年嘅 徽章交換同樂日 就可以玩得更加投入啦！