徽章交換同樂日 完結後，響 迪士尼星級款待 期間，園內都仲有一個小型活動舉行，就係 地球日！地球日 被定於每年嘅4月22日，目的係要向大眾宣揚環保，提醒大家要好好愛護屬於我地嘅地球！今日就係一年一度嘅 地球日，就等我同大家分享一下樂園裡面嘅 地球日 活動啦！
尋日，當我行緊去 灰熊山谷 嘅時候，突然見到兩個唔係咁常見嘅面孔，有兩隻螞蟻出現咗！原來係黎自電影《蟲蟲特工隊》嘅 阿飛、雅婷公主，佢地趁 地球日 出黎同大家見面！其實應該仲有幾位平日比較少見嘅 迪士尼朋友 出咗黎，不過我尋日就未有遇上佢地。
其餘項目同往年差唔多，樂園響週末會舉辦 綠悠遊之旅，向參加者介紹園內有關保護環境嘅資訊。另外，各個主題園區裡面都設置咗幾塊資訊板，俾賓客認識更多關於 地球日 以及環保嘅小知識！
配合 地球日 活動，今期樂園時間表都用咗樂園環保大使，蟋蟀占美尼 Jiminy Cricket 做封面主角！園方亦有派發一套以 地球日 做主題嘅貼紙，我好幸運地獲得其中一款以「環保3R」設計嘅貼紙！
發表今個月 迪士尼朋友 月曆嗰陣，我提及到今年係 迪士尼動物王國 Animal Kingdom 十五週年！迪士尼動物王國 位於 華特迪士尼世界 Walt Disney World，響1998年4月22日 地球日 開幕；響呢到再次祝佢十五歲生日快樂！亦期望我終有一日會有幸遊覽呢個主題樂園！哈哈！
沒有留言:
張貼留言