但係點解我入到去嘅？響星期六，一位先前返工時認識嘅同事朋友邀請咗我第二日去試玩！就響咁突然嘅情況下，知道自己好快就可以率先踏進新園區，好興奮！響到都再次感謝呢位朋友！
星期日傍晚，再連同另一位同事朋友，我地一行三個人，要進入 迷離莊園 探索啦！Go Go Go！
呢個世界獨有嘅主題園區裡面，重點項目必然就係全新遊樂設施：迷離大宅！我地第一時間就衝入去玩！不過，而家我想講埋園區內嘅其他設施先，一陣間先再講返呢間屋。
另一特別景點就係 奇幻庭園，擺放好多有趣嘅珍藏品，可惜嗰晚未有時間欣賞，下次先再去睇！
雖然呢個園區感覺上唔算好大，但係都有自己嘅商店同埋餐廳：迷離珍藏店、大冒險家餐廳！
商店、餐廳嘅位置比較接近 反斗奇兵大本營 嗰邊，獨立組成一群建築物，外觀亦設計得好特別！
當晚，遊樂設施 迷離大宅、迷離珍藏店、大冒險家餐廳 呢三個地點分別派發不同款式嘅貼紙；響網上見到仲有一款 猴子阿拔 嘅貼紙，不過就未知響邊到派發，下次又睇下有冇機會獲得啦！
之前成日響兩道 迷離莊園 大門前偷睇建設進度，呢晚望返大門後嘅 反斗奇兵大本營，格外感慨...
以上提及過嘅四個設施，就係新園區嘅主要設施，然而，仲有一個景點引起我嘅注意；就係之前都有寫文章講述過嘅貨運火車站，呢晚走到月台上面，見到有指示表明係「貨運用」。
呢到可以清楚見到 香港迪士尼樂園鐵路 嘅路軌，一條筆直嘅鐵路橫跨森林之中。
迷離莊園 嘅主人，亨利爵士，將自己大部份嘅珍藏品放咗響 迷離大宅 以及 奇幻庭園；但係園區內嘅其他位置都可以見到一啲珍藏品，有啲更加係剛剛先至運到黎莊園等待拆卸！
整個園區都設計得非常細緻，好多位置都可以見到呢個「MP」標誌，入到去記得望下地板啊！
一個咁仔細嘅園區，惟一嘅缺憾就係會見到 反斗奇兵大本營 嘅設施，有少少影響景觀... 我去過 迷離莊園 裡面嘅不同位置，好多地點都見到，呢啲設施始終都係太高啦...
好！就等我帶領大家進入 迷離大宅 啦！一個會令 香港迪士尼樂園 惹人羨慕嘅遊樂設施！但如果你短期內會有機會去玩的話，我會建議都係唔好睇落去，留返自己到時親眼睇啦仲好啦！
沿住隊列行，好快就黎到大宅入口，奇幻之旅正式開始！我地入去 亨利爵士 嘅私人博物館啦！
因為係預演日，所以入口呢到都有告示，提醒賓客 迷離大宅 仍然係響實習環境之下運作。
但係我嘅焦點當然唔係告示內容，係呢個牌！連個告示牌都整得細緻過人！再次見到「MP」標誌！
入到室內，迎接我地嘅係一幅 迷離莊園 1896年落成嘅照片，不過將卡通同真人混合起黎，有啲...
主人家梗係要介紹一下自己啦！呢幅畫作展示咗 亨利爵士，以及佢嘅好拍擋 猴子阿拔！
之後就有非常像真嘅 迷離莊園 模型，除咗 迷離大宅 之外，亦可以清楚睇到園區內嘅不同地點。
旁邊仲有兩幅結構設計圖；睇黎，亨利爵士 都好想將呢個莊園嘅建設經過同大家分享喎！
繼續響等待區內沿住隊列前進，會見到更多畫作，以下呢一幅就顯示咗 探險家協會 嘅成員；呢個協會嘅故事，原先係黎自 東京迪士尼海洋 嘅，或者遲啲可以再同大家分享一下。
設計 迷離莊園 嘅時候，幻想工程師 就將協會嘅故事延續到香港，創作咗 亨利爵士 呢個角色。
值得留意嘅係，響畫作嘅最左邊，出現咗拎住圖騰雕像嘅 高塔先生！佢都係 冒險家協會 嘅成員！呢位 驚魂古塔 主人同樣來自 東京迪士尼海洋，想更深入了解佢嘅話，可以睇返上年嘅故事文章。
再向前行，開始展出 亨利爵士 嘅少部份收藏品；呢個埃及頭飾金光閃閃，顯得特別珍貴呢！
響呢到亦會見到一幅世界地圖，充份證明 亨利爵士 係一個非常熱愛去到世界各地探險嘅人！
隨後幾幅畫作就係顯示爵士周遊列國嘅情景，紀錄低探險經歷；亦見到 阿拔 無時無刻都會陪住佢！
了解完 亨利爵士 嘅簡歷之後，就開始展示返有關 迷離莊園 嘅資訊；呢到詳細介紹 迷離大宅 博物館嘅各個展覽廳，令參觀者可以更清楚知道佢地一陣會睇到啲咩。
同時，呢個位置亦都介紹擺放響 奇幻庭園 嘅各件珍藏品，講解佢地嘅獨特之處。
咦！有門！究竟門後有咩呢？門上有個有趣設計，應該唔難察覺，就係代表 迷離大宅 嘅「MM」。
等咗一陣，兩道門打開啦！原來係一間非常華麗嘅講解室，中間有一個投映螢幕！呢間房整得同 幽靈公館 嘅講解室非常相似，相信係特別向呢個 迪士尼 經典遊樂設施致敬！
當所有參觀者都進入房間之後，大門慢慢關上，燈光漸漸轉暗，亨利爵士 開始向大家作出講解。
因為爵士正在響投映室裡面播放菲林片，所以我地暫時都未見到佢，反而 阿拔 就突然走咗出黎！阿拔 見到大家之後，好興奮咁叫咗一聲，同大家打招呼！至於佢叫咗啲咩，就等你自己發掘啦！
講解去到尾聲，爵士都向大家介紹佢嘅最新收藏品：音樂盒！睇黎 阿拔 對呢個音樂盒好有興趣喎！傳說話，呢個音樂盒擁有一種神奇嘅力量，唔知係唔係真嘅呢？不過爵士就覺得只係無稽之談...
講解完畢後，我地去到一條地道，繼續沿路向著登上電磁箱車嘅位置進發！事實上，由一開始進入 迷離大宅，整個等待區都好似響地底咁，睇黎博物館係位於大宅嘅地窖。
行到去盡頭，終於都到咗上車嘅地方！呢到都有註明遊樂設施嘅注意事項，作出最後提醒。
同樣地，我嘅焦點當然都唔係告示內容，剛才嗰個牌就有「MP」標誌，今次就係「MM」標誌！
上車嘅地方都仲係好似一個地窖，微弱嘅燈光令整個氣氛變得更加神秘，我好緊張啊！
呢啲就係由 亨利爵士 親自設計嘅 迷離莊園電磁箱車！終於都見識到呢架採用無軌系統嘅箱車！
係唔係真係已經諗清楚要繼續睇落去啦？好，我地上車，出發！首先黎到 展品收編室！
亨利爵士 出現了！佢原本響到搵緊 阿拔，但見到前面嗰個音樂盒，又即刻為我地介紹多一次！
爵士離開後，輪到調皮嘅 猴子阿拔 出場！佢始終都係忍唔住，好奇心促使佢打開呢個音樂盒...
好靚啊！音樂星塵 被釋放出黎，飄到 迷離大宅 博物館各處！睇黎 阿拔 仲未知道會有咩後果...
音樂星塵 為博物館內嘅所有展品帶來生命，經過每一個展覽廳，參觀者將會體驗奇幻歷程！不過請原諒我，我始終想保留返少少神秘感，唔想咁快就放太多相，暫時放住幾張 阿拔 嘅相片先！
雖然為咗保持神秘，唔想講太多詳細內容... 但係都想特別講下其中一個好有意思嘅場景！某個展廳內有好多圖騰雕像唱歌，同 提基神殿 非常相似，相信亦係向呢個經典遊樂設施致敬！
被賦予生命嘅展品令整個博物館變得非常混亂，阿拔 終於都意識到危機，決定將音樂盒關上...
關上音樂盒之後，一切回復平靜，阿拔 亦鬆一口氣，我諗佢都唔會再夠膽打開呢個音樂盒架啦...
就係呢個時候，亨利爵士 再次出現！佢終於搵到 阿拔 啦！最後，佢亦都同各位參觀者道別！睇黎爵士完全唔知道頭先所發生嘅事喎！就讓今次嘅奇幻之旅成為我地同 阿拔 之間嘅秘密啦！
落車之後，又見到一幅畫作，原來係 亨利爵士 同埋 阿拔 向我地揮手講再見！Bye Bye！
遊樂設施嘅出口直接連接住商店 迷離珍藏店，店內嘅裝潢亦都非常細緻，充滿古典風格。
有部份 迷離莊園 主題商品經已率先上架！不過暫時未吸引到我，期待稍後會有更多商品登場！
惟獨有一件衫引起咗我嘅注意，因為上面有齊 迷離大宅、冒險家協會 嘅標誌，算係幾有趣！
時間到啦... 好唔捨得，但都要離開啦... 首次試玩新園區就此結束... 最開心嘅係，第一次到訪 迷離莊園 就可以欣賞到夜景，感覺更加迷人之餘，亦更加迷離！
迷離莊園，我好快就會再黎搵你！下次，我一定要發掘更多得意嘅事物！我地4月30日再見！
沒有留言:
張貼留言