但係，上年去過，點先可以令今次旅程更加難忘？返到黎又可以點樣寫一啲同上次唔同嘅文章呢？所以，我要將 東京迪士尼之旅2013 嘅旅程升級，締造一個多姿多采嘅幸福歡樂之旅！
今年，東京迪士尼渡假區 為咗慶祝自己開幕30週年，舉行 幸福歡樂年 活動，推出超強嘅陣容；同時間，東京迪士尼海洋 亦再次趁住春臨大地之際舉行特別活動，米奇和Duffy的春日巡航！
兩大活動，加上樂園固有嘅遊樂設施、表演、迪士尼朋友 等等，必定會係一個非常豐富嘅旅程！不過，回想返上一年，因為時間唔係咁足夠，令我錯過咗好多特別嘅體驗... 咁點算呢？
為見及此，第一樣我要升級嘅，就係響 東京迪士尼渡假區 入面嘅逗留時間！我要玩耐啲！我成功說服咗爸爸媽媽，批准我將遊園日數延長至四日，俾我可以響兩大主題樂園玩餐飽！
仲記得，上年我係分別響6月12日、6月13日到訪 東京迪士尼樂園 以及 東京迪士尼海洋 嘅；響巧合之下，經已定出呢兩日會再次成為今年其中兩個遊園日！但點解可以咁快定出遊園日期嘅？
究竟有啲咩因素會限制咗遊覽樂園嘅日期呢？機票？假期？統統都唔係，係酒店！上年我就未有機會入住 東京迪士尼渡假區 內嘅 迪士尼酒店，而今次，我嘅願望終於都成真啦！
決定改去東京之後，嗰晚我就即時上網睇咗 東京迪士尼海洋酒店 嘅價目、預約情況等嘅資料；點知，偶然俾我發現，6月頭兩個星期只係剩返6月11日晚上有房，咁我當然咩都唔理，訂咗先！
原先去加洲都係計劃入住 迪士尼酒店 嘅，所以爸媽今次亦特別批准我選擇 東京迪士尼海洋酒店。嘩！好彩我訂房訂得快咋！我今日再上網睇睇，整個6月都已經冇哂房啦！果然係人氣爆燈！
講到 東京迪士尼海洋酒店，呢間酒店好特別架！佢係惟一一間位於主題公園裡面嘅 迪士尼酒店！部份房間更加可以望到園內嘅海洋，不過我訂咗嗰間就望唔到嘅，但係房內都有好多 迪士尼 元素！
睇黎，入住呢間酒店都可以展開一個尋寶之旅喎！我到時一定要落足眼力，睇清楚周圍嘅佈置！而配合 米奇和Duffy的春日巡航 活動，酒店房卡亦都換上新設計，充滿春日氣息！好靚啊！
話到明要締造一個多姿多采嘅幸福歡樂之旅，有咩會比起入住 迪士尼酒店 更加開心呢？就係入住多一間 迪士尼酒店！渡假區內仲有另外兩間 迪士尼酒店，而我就揀咗 迪士尼樂園酒店！
6月11日晚上住完 東京迪士尼海洋酒店，6月12日晚上，我地就會去到 東京迪士尼樂園酒店。亦因為咁，所以就定好咗6月12日會去 海洋 玩，6月13日會去 樂園 玩，剛剛同上年掉返轉！哈！
東京迪士尼樂園酒店 嘅外觀非常堂皇，房間亦非常華麗！入住呢間酒店應該會好似去咗夢境一樣... 我預訂咗嘅，係以一位 迪士尼朋友 做主題嘅房間！我好鍾意佢架！你估唔估到係邊個呢？
今年始終係 東京迪士尼渡假區 嘅30週年，歡樂氣氛當然亦會散播到 東京迪士尼樂園酒店 裡面！房卡，以及房間內嘅所有梳洗用品，全部都換上 幸福歡樂年 嘅主題！又要再講多次：好靚啊！
其實入住一晚 迪士尼酒店，價錢真係一啲都唔平！基本上，連續住兩晚，爸媽一定唔會答應嘅... 好彩我之前返工儲咗啲錢，所以負擔到第二晚嘅房間價錢，咁就唔洗錯過呢個咁難得嘅機會啦！( 咦... 聽聞，日元最近好似又再下跌喎！好耶！等同所有野都平啲，咁又可以買多啲野！嘿嘿！)
兩大主題樂園、30週年慶典、米奇和Duffy的春日巡航、連續四日入園、入住兩晚 迪士尼酒店... 咁多野夾夾埋埋，今次必定會係一趟史無前例嘅幸福歡樂之旅！東京迪士尼之旅2013，6月啟航！
沒有留言:
張貼留言