上星期放咗張 香港迪士尼樂園 五週年 嗰陣嘅圖片，其實係寓意緊 Tho's Dreams 第500篇文章！今日，呢個Blog終於累積咗500篇文章，又係一個里程碑！當然都要再次感謝各位網友嘅支持！距離上次300篇文章好似隔咗一段幾長嘅時間，可能係因為多咗更新文章，而唔係開過一篇新嘅；不過點都好，最重要係能夠同大家分享我所遇到嘅事、我嘅感受、我嘅夢想，以及 迪士尼 嘅奇妙！
為慶祝第500篇文章，Tho's Dreams 頁面又再換新裝，但大致上都同之前嘅頁面差唔多嘅。原先蔚藍嘅天空，而家已經變成漆黑嘅夜空啦！奇妙仙子 響半空灑滿奇妙星粉，環繞整個頁面！標題圖片就用咗 睡公主城堡，加埋兩旁嘅奇妙星粉，算唔算係重現 奇妙仙子城堡 呢？哈哈！
假如你嘅觀察力夠強的話，應該唔難發現，響頁面嘅右邊多咗一個同500篇文章有關嘅欄目！欄目入面，我放咗三個專題，亦係 Tho's Dreams 未來嘅最新動態！我都趁呢個機會介紹一下啦！第一個專題就係 迷離莊園，呢個全新主題園區將會響五月隆重開幕，試玩亦會於四月尾開始；所以，未來一個月嘅所有焦點將會集中響呢個全球獨有嘅園區身上，好期待啟動倒數嘅一刻啊！
咦？東京迪士之旅2013？等一等！係唔係打錯字啊？唔係 加洲迪士尼之旅2013 咩？我冇打錯字，反而，我想響呢到宣佈一個消息，就係：我轉軚了！我決定改去 東京迪士尼渡假區！一直以黎，我都同自己講，唔洗咁急，新巡遊響之後嘅五年都會演出，唔洗咁急趕住去啫！但尋日見到一張相片，我最後都忍唔住啦！啲裝飾真係超華麗！我要參與佢地嘅30週年慶典！
我可以響咁短時間就由去加洲改去東京，就證明咗 東京迪士尼渡假區 嘅吸引力究竟有幾強勁！今年，我要締造一個多姿多采嘅幸福歡樂之旅！敬請期待 東京迪士尼之旅2013 前篇！咁加洲點啊？我自己都唔知... 2015年將會係加洲嘅60週年慶典，或者嗰年先至去啦...
之前有一個專題文章分類叫做 想像‧繪畫，原本嘅用意，係想俾自己放一啲畫作上黎；但我始終都對自己嘅畫作冇咩信心，同埋都冇咩時間畫畫，所以開咗呢個分類咁耐都冇放過畫。而家我將佢改做一個新專題，想像‧帶動魔法 Imagineering Magic，將會係一個寫文章嘅新題材。
見到 Imagineering 呢個字，相信大家都估到，呢個專題將會同 華特迪士尼幻想工程 有關。上年，有一位網友響 Tho's Dreams 留言話俾我知，原來佢都對 迪士尼幻想工程 好有興趣！自此我地就成日傾計，討論好多關於 迪士尼 主題公園、動畫等等嘅野，成為咗一對好朋友！
前嗰排，我地決定合作，寫一啲以 迪士尼主題公園 概念為主嘅文章！稍後將會發展呢個新專題！
除咗固有嘅題材之外，我都希望可以進一步發展更多範疇，以及嘗試用唔同嘅角度去寫文章；期望我響未來可以突破自己嘅框框，將更多幻想力、想像力投入 Tho's Dreams，延續奇妙！
沒有留言:
張貼留言