羊之危機: 香港迪士尼樂園 商品率先被攻陷...

自從決定去 東京迪士尼渡假區，我都不斷上網睇一啲有關商品嘅資訊，剩係睇下都覺得開心！但係由今日開始，當我再見到呢啲商品圖片嘅時候，我將會由開心變成痛心...

今日得知一個既震撼、又可悲嘅消息：喜羊羊與灰太郎 系列商品經已登陸 香港迪士尼樂園...  但係好抱歉，我冇相片，亦唔會影相放上黎 Tho's Dreams，起碼我唔想連自己個Blog都受污染...

作為一個 迪士尼 Fans，當知道佢地收購咗一個我認為係完全唔夠班嘅動畫，我已經好無奈...  不過我依然慶幸全球各個 迪士尼主題公園 嘅奇妙世界並未受到污染，咁我都仲可以當隻羊冇到...  黎到今日，呢一日終於都出現咗，仲要係出現響我所愛嘅 香港迪士尼樂園，我無話可說...  然而，呢件事又再次令我回想，我愛呢個樂園，但係呢個樂園又有冇愛過我地、理會過我地？

為咗少少嘅商品利潤，園方甘願破壞自己嘅品牌、令一眾樂園Fans失望，咁樣真係值得嗎？香港迪士尼樂園 嘅商品設計一直都唔算出色，我亦從來冇期望過佢地能夠做到好似東京咁出眾；但最可笑嘅係，原本 迪士尼 經已創作過幾百個 迪士尼朋友，佢地唔用，反而係都要用呢隻羊...  我只想講，我決定留返啲錢去東京係冇錯嘅...  香港迪士尼樂園，多謝你一次又一次令我地失望...

歡迎各位響呢篇文章留低你嘅感受，讓所有人，包括園方，都可以知道一班樂園Fans嘅心底話。