迷離莊園 開幕，當然有好多新商品登場，而我當然亦都唔能夠抵抗得住呢啲商品嘅誘惑，哈哈！其實我自己就覺得今次嘅商品設計算係做得唔錯，有好多都好特別，所以我先至會忍唔到手！
其中，令我花費最多嘅，係一系列徽章！我終於開始有少少後悔，上年開始咗儲徽章呢個嗜好... 以下呢兩個係 迷離莊園 開幕紀念徽章，分別限量500杖，而右邊嗰個係 奇妙處處通 會員獨家嘅。
呢個 猴紋音樂盒徽章，係可以打開架！內裡印有 迷離大宅 標誌，以及顯示「2013年開幕」字樣。
兩個徽章嘅背面都有「迷離莊園 2013年開幕」嘅字樣，會員獨家徽章亦印有 奇妙處處通 標誌。
除咗限量版開幕紀念徽章，仲有好多以新園區做主題嘅徽章！我就買咗以下呢五個徽章！
我覺得比較得意嘅，係呢兩個 米奇、唐老鴨 電磁廂車徽章，因為佢地係可以連埋架！
尋日都有提及，迷離珍藏店 亦開始發售少量來自世界各地不同 迪士尼主題公園 嘅商品。園方呢個構思值得一讚，可以俾我地有機會見識到其他樂園嘅商品，咁咪仲好過賣嗰啲狼羊！
現時所發售嘅商品都係來自美國嘅兩個 迪士尼渡假區，暫時就未見到有巴黎或者東京嘅商品；呢啲商品都係環繞著 Tower of Terror、Haunted Mansion、Expedition Everest 呢幾個遊樂設施。
之前嘅 想像‧帶動魔法 系列文章就同大家分享過 Haunted Mansion 係 迷離大宅 嘅姊妹作；另一方面， 東京迪士尼海洋 版本嘅 Tower of Terror，故事亦都同 迷離大宅 有連貫性嘅。不過，現時嘅 Tower of Terror 商品並非來自 東京迪士尼海洋，而係來自其他 迪士尼主題公園。其他主題公園嘅版本以電影《The Twilight Zone》做主題，同 迷離大宅 未有直接關係。
返返去莊園嘅主題商品先，我另外仲買咗明信片同埋記事簿，不過我諗最後都會唔捨得用！嘻！
記事簿唔多講啦，但係就想講下呢個明信片套裝；一套總共三張，都幾靚，而且仲唔算貴添！
大家之前整過幾多塊個人化名牌呢？迷離莊園 開幕又令我整多一塊... 今次係我第一次整中文字！
最後兩樣商品，對我黎講可以話係壓軸！係咁多樣商品之中我最喜歡嘅！就等我向大家推介一下！
第一樣就係可愛嘅 阿拔 毛公仔！聽聞今日經已售罄了，睇黎 阿拔 將會成為園內新一位人氣王！阿拔 其中一樣象徵性特點，就係佢嗰頂土耳其高帽，呢隻公仔都有戴住土耳其高帽呢！
公仔嘅腳上仲有一個綠色嘅印章，上面繡有 迷離大宅 標誌，代表著佢係黎自 迷離大宅 嘅！
呢隻公仔亦有附送一本迷你故事冊，同 Duffy 嗰本有啲相似，裡面介紹咗 阿拔 嘅背景資料。
另一樣我想特別推介嘅商品，就係呢個收藏盒！造型參照咗大宅故事中嘅 猴紋音樂盒，好像真！
打開收藏盒，就係一個細小嘅儲物空間，我而家就暫時用佢黎放住我新買返黎嘅徽章。
丫！唔知道，假如我隻 阿拔 打開呢個收藏盒的話，又會唔會有 音樂星塵 釋放出黎呢？
要成為收藏家，係唔係一定要用錢去購買珍藏品呢？當然唔係！唔好唔記得仲有禮物換！奇妙處處通 會員由即日起至6月30日，可以去到會員服務中心換領3D遊戲卡一張！記住去換啊！
遊戲卡用信封裝住，由一張貼紙封住；呢張貼紙整到好似一個印章咁，上面亦有 迷離莊園 標誌！
打開信封，裡面都非常精緻！係 迷離大宅 嘅圖片！再次細看呢間屋嘅外貌，真係覺得好靚！
至於呢張遊戲卡，請怒我未能分享係顯示咩圖案，因為我永遠都睇唔出呢啲3D圖案嘅，嗚嗚...
最後，我竟然比起原先嘅預算洗多咗一倍... 好耐未試過一日之內響 香港迪士尼樂園 洗咁多錢... 不過算啦，迷離莊園 話哂都係我最喜歡嘅一個園區，就俾自己響開幕呢個大日子開心一下啦！但係... 迷離莊園 已經令我瘋狂掃貨，我唔敢想像去到 東京迪士尼渡假區 會發生啲咩野事...
沒有留言:
張貼留言