期待已久嘅全新主題園區，迷離莊園，終於響今日隆重開幕啦！我地等呢日已經等咗好耐啦！樂園版圖再次擴展，加入第七個園區！呢一日係樂園嘅大日子！而家就等我直擊園內嘅開幕盛況！
響欣澳站同朋友匯合後，我地就繼續向樂園進發！到達時間為早上8:00，迎樂路 好冷清呢！咁早入去，原因只有一個！就係渴望要成為 迷離大宅 嘅首批賓客！距離樂園開放仲有兩小時...
去到 滑浪米奇 噴水池嗰邊，樂園都仲未開閘，於是我地就響涼亭坐低，一邊傾計一邊等待...
時間黎到早上8:45，開閘啦！但其實開唔開閘都冇咩分別，開咗都只係響正門繼續等待...
樂園平時會響正式開放前半小時首先開放 美國小鎮大街 供賓客遊覽，但係9:30都未入得喎！我地問一問保安姨姨，原來今日10:00先至全園開放；佢亦有主動向我地介紹 迷離莊園，好好人！
終於夠鐘啦，進園後，我地當然即刻衝去 迷離莊園！由正門跑入去，路程咁長，都咪話唔辛苦！衝啊衝，跑啊跑，終於到達終點！點知，竟然有團體因為可以提早入場，已經抵達咗大宅入口...
響不公平競爭底下，我地咁就輸咗... 不過都唔緊要啦，繼續體驗 迷離大宅 嘅奇幻歷程啦！演藝人員開始講解 迷離莊園 嘅故事，但係我跑到半死，冇留心聽；而今日仲有特別嘉賓，Noble！
Noble 係樂園嘅營運副總裁，上年 灰熊山谷 開幕都有到場，但今次就唔係由佢黎做講解。今日佢一開聲，就係同我地講：電磁廂車出現少少技術問題，所以要遲少少先可以展開奇幻之旅...
唉，嗰個系統真係唔爭氣... 今次佢地有派發特別Fastpass俾我地，比起預演日嘅安排悉心得多！呢張卡可以話係一份可遇不可求嘅紀念品，我地又點捨得用呢？我地仲邀請 Noble 響上面簽名呢！
未有得玩，於是就去咗 迷離珍藏店 瘋狂掃貨！大量主題商品響今日正式上架，好多都好吸引啊！睇下！好多隻 阿拔 毛公仔啊！係唔係好可愛呢？我都買咗一隻帶返屋企！
店內亦由今日開始發售來自其他 迪士尼渡假區 嘅商品，同時亦有世界各地民族嘅珍藏品。我響聽日會發表一篇關於 迷離莊園 主題商品嘅文章，敬請繼續期待！
掃貨後，其實 迷離大宅 已經開放返；首日氣勢都非常強勁，等待時間一度長達90分鐘！最壯觀嘅係，隊列更加曾經延伸至 灰熊山谷！場面非常震憾！
雖然係顯示等待時間為90分鐘，但我地由排隊去到玩完嘅一刻，都只係用咗大約40分鐘啫。而今日再玩嘅時候，都發現又加咗少少新野！例如，呢幅世界地圖就加入咗珍藏品嘅來源地！
完成奇幻之旅，我地離開 迷離莊園，響樂園裡面周圍行下。配合新園區開幕，園內所有指示牌、資訊亭、地圖，都需要即時作出更新，加入新園區嘅資料！
終於都見到呢幅完整、完美嘅樂園地圖！見證著一個又一個嘅新園區開幕，好感動！
當然，樂園印刷品都要更新！時間表就響星期日率先更新咗 迷離莊園 封面，今日輪到樂園指南！
睇到地圖，就令我醒起：莊園大門經已打開，從今以後，我地就可以更方便咁往來園內各處！反斗奇兵大本營 以後亦都唔再需要響煙花表演前提早關閉，都係一件好事黎嘅！
講到 反斗奇兵大本營，唔知響 迷離莊園 開幕後，佢同 灰熊山谷 又會唔會被搶走人氣呢？依今日所見，似乎真係有啲影響喎！兩個園區裡面嘅遊樂設施，等待時間都有稍微減低...
玩咗兩次 迷離大宅，都滿足啦！今日冇留低太耐，下次先再次響晚上遊覽 迷離莊園 啦！臨走前都有入一入 百貨店 睇下野，儘管見到一啲唔想見到嘅狼羊，好彩都見到 迷離莊園 專區！
迷離大宅 系統唔生性，天氣又唔算好好，令人有啲不快... 但總括黎講，依然係一個奇妙嘅開幕日！響到亦要多謝兩位朋友陪我玩足大半日，同我一齊感受奇妙嘅一天！多謝你地啊！
沒有留言:
張貼留言