樂園事物仔細尋 - 猴子的迷離秘密

「事物仔細尋」系列又再出場，而今次嘅主題當然係環繞住全新開幕嘅主題園區，迷離莊園！迷離大宅 嘅故事，係由一個音樂盒開始，猴子 阿拔 對呢個盒充滿好奇心，千方百計想要打開佢...

究竟呢個音樂盒係何方神聖呢？原來佢叫做 巴里猴紋鑲寶石音樂盒，傳說擁有神秘嘅力量...作為收藏家嘅 亨利爵士，最後就將佢帶咗返自己屋企，令音樂盒成為 迷離大宅 最新一件珍藏品。當遊人進入爵士嘅私人博物館嗰陣，響門口就可以見到一幅圖片，展示爵士獲得呢個盒嘅一刻。

而爵士響進行講解嘅時候，都再次向大家介紹呢件最新嘅珍藏品，不過佢就唔相信所謂嘅傳說...  而 阿拔 亦再次展現出佢嘅好奇心，伸手想打開佢；唔知係唔係因為見到盒上有自己嘅同類呢？

最後，當我地登上電磁箱車，開始參觀博物館嘅時候，阿拔 終於都得償所願啦！就響佢打開嘅一刻，音樂星塵 被釋放，為博物館內所有展品賦予生命，同時為我地展開奇幻之旅！

傳說係真架！呢個盒的確擁有神秘力量！不過，要釋放音樂星塵需要一個條件，就係由猴子打開！難怪 亨利爵士 會認為傳說只係無稽之談，因為當爵打開嘅時候，佢只不過係一個普通嘅音樂盒...

事實上，莊園各處都可以見到猴子嘅蹤影，特別係響 迷離珍藏店 裡面！唔通係用黎陪伴 阿拔 嘅？響火爐上方有幾尊猴子石像，牆紙上又有猴子圖案，證明咗猴子響呢到的確有舉足輕重嘅地位！

諗返轉頭，假如爵士嘅助手唔係一隻猴子，又或者冇咗猴紋音樂盒，我地就冇得體驗奇幻旅程！當然，呢一切都係 幻想工程師 刻意鋪排嘅；但點都好，我諗我開始鍾意咗猴子 阿拔 啦！>_<