樂園事物仔細尋 - 發掘樂園海報!

前日先至出咗一篇「事物仔細尋」系列文章，係關於 迷離大宅 嘅，而今日又有新一篇出場啦！不過今次同新園區冇關，亦都唔係一啲特別嘅新發現，相反，其實響園內係可以成日都見得到！我講緊嘅，就係海報！園內各處都刊登咗好多海報，但係唔知你平時會唔會忽略咗佢地嘅存在呢？

全園最多海報嘅園區，必然係 美國小鎮大街！一入樂園，經過火車軌底下，已經有一大堆海報！

大街唔同嘅位置都放咗好多不同遊樂設施、餐廳嘅主題海報，為你介紹園內各項設施。

去到大街嘅盡頭，雖然唔太顯眼，但呢個位置都放咗幾張海報，點綴一下周圍嘅環境。 

穿過一個門口，我地就正式進入 明日世界，又有一堆海報歡迎你黎到呢個未來嘅星際港口。

當然，明日世界 嘅海報係環繞返自己園區嘅主題，介紹返區內嘅遊樂設施同埋餐廳。

事實上，除咗 美國小鎮大街、明日世界，其他園區都冇咩海報...  只係兩大劇場會有表演嘅海報...

差啲唔記得，仲有 幻想世界音樂廳！佢都算係一個劇場，所以都有 米奇幻想曲 嘅表演海報！

最後，為大家送上一張園內最新刊登嘅海報！就係 迷離大宅 裡面有關電磁廂車嘅海報！

咁多海報之中，你又最鍾意邊一張呢？但係點解我會突然間講起海報嘅呢？聽日就會知道！嘿嘿！