上年年尾，我同朋友一齊訂咗好多 迪士尼 書籍，其中一本叫做「Poster Art of the Disney Parks」由書名可以得知，呢本書係講述 迪士尼主題公園 海報藝術嘅，今日就想同大家分享一下呢本書。
聽到 華特迪士尼幻想工程 Walt Disney Imagineering 呢個名字，相信會令你諗起樂園建設！但係你又知唔知道，其實樂園裡面嘅所有海報都係佢地負責製作嘅！所以呢本書都係由佢地出版！
書中內容就首先介紹到海報對 迪士尼主題公園 嘅意義、價值，亦有講到海報響園內嘅使用情況。原來，呢啲海報嘅最主要用途，並唔係用黎介紹園內不同嘅設施，反而係用黎做裝飾！
當初 華特迪士尼先生 設計 迪士尼樂園 嗰陣，心中係想將整個樂園比喻為一個用作演出嘅劇院；美國小鎮大街 作為呢個劇院嘅大堂，又點可以冇節目海報呢？所以最後就出現咗一張張海報！
講完樂園海報嘅背景資料後，書中就開始以主題園區黎做分類，展示各個設施嘅獨有海報。
第一個園區，當然就係「劇院大堂」，美國小鎮大街！以下呢三張都係 迪士尼樂園鐵路 嘅海報！
另外有一幅海報特別引起咗我嘅注意，就係 東京迪士尼樂園 嘅 世界市集 World Bazzar。東京迪士尼樂園 係現時惟一沒有 美國小鎮大街 嘅 迪士尼樂園，取而代之嘅就係 世界市集。
事實上，世界市集 嘅風格同 美國小鎮大街 非常相似，不過佢就有一個獨有嘅特點：天幕！而響呢幅海報上面，都特別強調咗天幕呢個特點，令 世界市集 顯得與別不同！
下一個園區，就係 探險世界！書中都刊登咗好多來自 香港迪士尼樂園 嘅海報！
以下呢幾張 森林河流之旅、獅子王慶典、河景餐廳 嘅海報，又會唔會令你覺得特別有親切感呢？
仲有 泰山樹屋！可以見到，雖然其他樂園嘅樹屋並唔係以 泰山 做主題，但海報都係大同小異；剛才嘅 迪士尼樂園鐵路 海報都係一樣，不同樂園嘅鐵路就算有少少差異，海報都係差唔多嘅。呢個做法，或者係刻意用黎聯繫起各個 迪士尼樂園 嘅遊樂設施，令佢地更加有連貫性。
呢本書嘅內容係以加洲嘅 迪士尼樂園 黎編排嘅，所以有一啲主題園區係香港冇嘅。邊域世界 Frontierland 就係其中一個香港冇嘅園區，不過 灰熊山谷 可以話係佢嘅呢一個版本。
呢個園區最經典嘅遊樂設施，就係 Big Thunder Mountain 巨雷山、Splash Mountain 飛濺山！丫，話時話，我都未見過 灰熊山谷 嘅海報，唔知有冇嘅呢？如果有嘅話我都有興趣想睇下！
書中下一個部份，就係 New Orleans Square 新奧爾良廣場，一個加洲 迪士尼樂園 獨有嘅園區。佢地嘅 Haunted Mansion 幽靈公館 就係位於呢個園區裡面嘅，海報上面有三隻鬼魂跳舞！
下一站：幻想世界！頭先就特別講到部份遊樂設施嘅海報響不同 迪士尼樂園 係差唔多嘅... 但係，另一啲遊樂設施嘅海報又未必會採用相同嘅做法，世界各地嘅版本可能會相差好遠... 小飛象旋轉世界、瘋帽子旋轉杯 嘅海報，各個版本都有一定程度嘅差別，或者係同時代有關。
最大差別嘅，係 小小世界 嘅海報！其他樂園嘅版本都比較簡單，然而，香港版本就畫咗好多野！唔通係因為香港嘅 小小世界 係最新嘅一個？見到呢張海報，我突然為 香港迪士尼樂園 感到自豪！
好啦！只係剩返 明日世界 未講啫！呢個園區最具標誌性嘅遊樂設施，固然就係 飛越太空山！書中都有各個 迪士尼樂園 不同版本嘅 太空山 海報，你認得出邊一張係黎自 香港迪士尼樂園 嗎？
講到 明日世界，就不得不講 巴黎迪士尼樂園，因為佢地嘅 明日世界 係全球最特別嘅一個；嚴格黎講，巴黎迪士尼樂園 並無 明日世界，佢地有一個獨有嘅園區 探索世界 Discoveryland。
探索世界 同樣係以科幻做題材，但係響整體景觀上，就有明顯分別，尤其係佢地嘅 太空山！
巴黎嘅 太空山，外觀用咗綠色做主色，內裡嘅星際之旅亦有差異，所以連張海報都寧舍有意境！
除咗 太空山 之外，明日世界 呢個主題園區仲有另一個大受歡迎嘅遊樂設施，就係 馳車天地！隨著時代變遷，我地嘅汽車都慢慢改進，所以 馳車天地 不同版本嘅海報，差異係更加明顯。順帶一提，呢個遊樂設施響不同地區所採用嘅題材係有分別嘅，例如東京版本就用咗賽車做題材。
展示所有 迪士尼樂園 主題園區嘅海報之後，呢本書響最後都特別收錄另外兩個主題公園嘅海報。其中一個就係響上年先至完成大規模粉飾工程，剛剛「重生」嘅 迪士尼加洲冒險樂園！
雖然我就仲未有機會到訪 ( 其實係自己暫時放棄咗呢個機會 XD )，不過都對啲海報幾有興趣！我好鍾意 米奇摩天輪 Mickey's Fun Wheel、反斗車王天地 Carsland 呢幾張海報嘅畫風啊！
另一個特別收錄嘅樂園，就係被譽為世界上設計得最細緻嘅一個主題公園：東京迪士尼海洋！一個咁高評價嘅樂園，值得擁有一個屬於自己嘅章節！而首幅展示出黎嘅海報，就係 驚魂古塔！
其餘仲有一啲標誌性遊樂設施嘅海報，包括大受好評嘅過山車，忿怒雙神 Raging Spirits。另外亦有上年先至盛大開幕嘅 反斗奇兵瘋狂遊戲屋 Toy Story Mania，可以見到一眾玩具角色！
全本書入面，有一頁我覺得係最得意有趣嘅，因為呢一頁顯示咗樂園海報嘅製作過程；每一張海報響設計嘅時候，都係逐隻逐隻顏色咁加上去嘅！睇落好似好易，但相信都要好花心機！
我地作為一間「劇院」嘅「觀眾」，往往都會忽略咗裡面嘅「節目海報」，覺得佢地冇咩特別... 但係當知道咗海報背後嘅意義，以及設計者所花嘅心機，其實每一張海報都值得我地細心欣賞！
請問係邊度訂
回覆刪除