月夜下再遊 迷離莊園...

開幕當日冇留到夜晚，未有機會再次欣賞 迷離莊園 嘅夜景，不過冇所謂啦，開幕後大把機會啦！而就響開幕嘅一星期後，我響星期六入咗樂園玩，終於都可以再次響晚上到訪 亨利爵士 嘅家園！呢個週末係 奇妙處處通 銀卡特選週末，日間人流都唔少，但係黎到晚上，又開始少返啲人...

入夜後，人少咗，可以響寧靜嘅環境下再次細看莊園裡面嘅事物！我諗我暫時都唔會睇厭！哈哈！

大冒險家餐廳 響開幕日曾經大排長龍，呢個晚上卻有啲冷清，唔知係唔係同價錢有關呢？

雖然價錢真係唔平，不過都想試下佢地嘅海南雞飯，於是呢一晚又選擇響呢到食晚餐。

海南雞飯套餐，味道算係唔錯，但係同其他地方其實差唔多，所以我響到試一次就足夠架啦...

今次我揀咗響 埃及主題房間 用膳，最能引起注意嘅，必定係房內所擺放嘅木乃伊棺木！

亨利爵士 係一個好有條理嘅人，佢會為自己嘅每一樣珍藏品寫一篇日誌，以作紀錄！

呢到就提及爵士係響1888年獲得呢件珍藏品嘅，佢同 阿拔 都對裡面嘅木乃伊感到非常好奇呢！

食完飯，當然要去玩下 迷離大宅 啦！玩咗好幾次，轉眼間就去到關門嘅時間，要離開啦...

香港嘅天氣真係好意想不到，日頭不停落大雨，夜晚就一滴雨都冇，仲可以隱約見到月亮添！

臨走前都特別影低另外兩個園區寧靜嘅一面；漂亮嘅燈光效果，加上冇咩人，真係特別有韻味！

我咁鍾意晚間嘅 迪士尼樂園，下年全新推出嘅夜間巡遊，一定啱哂我口味啦！所以我都好期待！迷離莊園 開幕都足足等咗四年啦，夜間巡遊響一年之後就會登場，應該唔會等得好苦嘅！:)