感受飛翔 - 香港國際機場 展望台

大家睇到以下呢張相，可能都會認得係 香港國際機場；但係我點解會突然放呢張相上黎呢？東京迪士尼之旅2013 唔係6月4日啟航咩？點解突然間會去咗機場？哈哈，當然係有原因啦！

今日無啦啦走去機場，其實係因為我想趁住有空閒時間，去到香港不同嘅景點睇下、見識下。香港國際機場 二號客運大樓 正正就係有一個好特別、好有趣嘅景點：航空探知館！

展館唔算好大，不過都展出咗好多同航空、飛機有關嘅資料，而裡面嘅展品都整得幾有心思。

呢到仲有模擬機艙，其中一個係以前客機上嘅舊式機艙，另一個就係而家嘅商務客位。

館內有一個位置講到由香港飛去不同目的地嘅飛行時間，等我又即刻睇下飛去東京要幾耐先！

但係，我今日專程走入機場，並唔係為咗睇呢個展覽，因為之前都曾經黎過好幾次，已經睇過。今次黎呢到，係想去機場展望台睇下！以前黎過幾次都未有機會上去睇下，今日終於上到去啦！

一上到去，就發現有一幅機場島嘅平面圖；機場島嘅面積的確好大，遲啲仲應該會再擴建添啊！

現時，香港國際機場 有兩條跑道，響一般情況下，一條會用作飛機起飛，另一條就用作降落。今日黎到機場，見到南面跑道係用作起飛嘅；一架架飛機排隊等待起飛，逐架逐架向天空進發！

南面跑道用作起飛，換言之，北面跑道係用作降落嘅；不斷有飛機慢慢接近機場，準備降落。平均每一至兩分鐘就會有一架飛機降落，難怪 香港國際機場 會被稱係全球最繁忙嘅機場之一！

今日響展望台大約逗留咗40分鐘，見到好多不同航空公司嘅飛機呢！亦都有好多不同嘅機種！

講到航空公司，香港人最屬悉嘅，當然就係 國泰航空公司 啦！平時去旅行好多時都係坐國泰！

除咗飛機，響展望台上面都可以睇到其他機場島嘅景物，包括 機場快線、亞洲博覽館 等等...

而我覺得最壯觀嘅，就係的士軍團！好多的士響到等待上客！有市區的士，亦有新界的士！

睇完飛機，睇完風景，係時候走啦！離開前，都不忘去 香港迪士尼樂園 奇妙店 門口影返張相！

今日入機場之前，我仲去咗另一個景點！究竟我去咗邊到呢？過多兩日再同大家分享啦！