仲有一星期，東京迪士尼之旅2013 就啟航啦！充滿幸福歡樂嘅旅程即將展開，我愈黎愈興奮！上個月同大家分享過，日本迪士尼雜誌 Disney Fan 都有介紹一啲關於三十週年慶典嘅資訊；活動開始咗大約一個月，佢地又出咗一本三十週年特刊！今日就等我同大家一齊睇下呢本特刊啦！
特刊用咗 幸福在這裡 米奇汽球花車 黎做封面相片，色彩非常繽紛呢！米奇、米妮 亦同大家揮手！
每期 Disney Fan 雜誌都會附送兩張明信片，而呢本特刊就送夠四張！另外仲有貼紙送，正啊！
又有揭頁喎！一打開，原來係 Casey Jr. 嘉年華會花車！同樣係黎自全新嘅 幸福在這裡 巡遊！
背面嘅相片就係 東京迪士尼海洋 三十週年特別表演項目，海上傳幸福！有 Duffy迪士尼小熊 啊！
叫得做三十週年特刊，比起上一期雜誌當然有更加詳細嘅 幸福歡樂年 活動資訊！仲有好多相！
雖然有好多資料我都已經響網上睇過，但係呢本雜誌就有更多相睇，所以買返黎都有用嘅！
另外，有幾頁就介紹剛剛響5月7日重新開幕嘅 東京迪士尼樂園 遊樂設施，星際旅行‧冒險續航。
講完 東京迪士尼樂園，之後就轉到去另一主題公園 東京迪士尼海洋！再次見到 Duffy迪士尼小熊！
除咗渡假區三十週年慶典，特備活動 米奇和Duffy的春日巡航 都繼續進行緊，書中都有再度提及。
好啦！去到我最緊張嘅一個部份：商品！我已經做好心理準備，預咗自己到時發咗癲咁掃貨架啦！
呢本特刊好有心思啊！特別將貨品依照價錢分類！呢到所刊登嘅商品亦都比起官方網頁多好多！
今次嘅特刊仲有專欄介紹三十週年主題美食；睇相好似真係好吸引，我會記得去試食架啦！
另一個我最鍾意嘅專欄就係回顧專欄，記載著 東京迪士尼渡假區 過去三十年嘅每一個重要時刻！
特刊亦有特別加插咗一個特別部份，就係樂園地圖！可以剪出黎入園嘅時候拎黎睇，非常方便！不過我應該唔會用啦... 我唔捨得剪本書... 所以我決定會自製遊園攻略！嘿嘿！
睇到黎呢本書嘅尾聲，有幾張全版相片，每一張都好靚好夢幻！有一張係 米奇家族 嘅合照！
仲有一星期咋！睇完呢本特刊令我更加雀躍！但我相信一星期好快就會過去！我會繼續期待落去！
2013年4月17日
請原諒我呢排成日講 東京迪士尼，因為我真係好興奮！同埋，其實 香港迪士尼 呢排都冇咩好講... 今日想分享嘅呢一樣野，以前都曾經講過嘅，就係日本 迪士尼 官方雜誌，Disney Fan！呢本雜誌收錄咗所有關於 迪士尼 嘅最新資訊，咁當然要收集一下情報，到時去到先唔會錯過嘛！
講到最新資訊，必然係 東京迪士尼渡假區 三十週年！所以今期都用咗相關封面，色彩非常繽紛！
打開呢本雜誌後，有揭頁喎！再將揭頁打開，原來係 米奇、米妮 嘅合照！佢地好恩愛啊！
背面就係 東京迪士尼樂園 全新日間巡遊 幸福在這裡 花車模型照片，好靚！但係亦都好貴！
封面咁大隻穿上三十週年服飾嘅 米奇，雜誌裡面固然有大量篇幅係同 幸福歡樂年 慶典有關；首先就介紹咗 幸福在這裡 巡遊，同時亦附上過去三十年黎 東京迪士尼樂園 上演過嘅巡遊資料。
之後就係一系列主題商品，雖然先前已經響網上睇過，但再次響雜誌見到，我依然好雀躍！
睇完主題商品，仲有主題食品！睇到我流哂口水！特別係嗰個 米奇帽子蛋糕，到時一定要食！
除咗三十週年慶典之外，另一焦點就係 東京迪士尼海洋 特別活動，米奇和Duffy的春日巡航！上年體驗過呢個活動，不過始終係 Duffy迪士尼小熊 做主角，我又點會厭呢？都係咁期待！
東京迪士尼 的確係好強！就算係捲土重來嘅活動，佢地都會將所有項目升級，包保唔會悶！講起表演，上年因為覺得啲表演唔算太吸引，所以冇睇哂，但睇黎今年啲表演吸引力大增喎！
又有商品啦... 點算啊... 佢地推出啲咁靚嘅野，我真係會忍唔到手架... 我有啲驚自己返唔到黎啊...
唔單止 東京迪士尼渡假區，日本 迪士尼商店 都有好多新商品架！佢地最新推出咗水果系列！好彩，我就對呢個系列嘅興趣不大，可以集中返響其他心水商品，哈哈！
雜誌亦有其他有趣嘅專欄，呢啲用咗 迪士尼朋友 造型設計嘅迷你撻都幾得意喎，仲有 Oswald！
隨書附送兩張精美明信片，其中一張同封面圖片相同，呢一張就用咗 鴨嘴獸泰瑞 Perry 做主題。
每次睇資料，幻想自己到時去到現場嘅情景，就會好開心！Duffy、東京迪士尼，你地要等我啊！
沒有留言:
張貼留言