Vinylmation狂熱! 另一種交換樂趣!

上年無啦啦開始咗收集徽章呢個小嗜好，之後去到上個月，我又第一次參與咗 徽章交換同樂日；然而，近期我突然又多咗一個新嘅小嗜好，就係 Vinylmation「型」像交換！

點解又會開始交換 Vinylmation 呢？咁就要返返去5月17日，由 迷離莊園 開幕當日開始講起；嗰日我同朋友響 迷離珍藏店 瘋狂掃貨，最後超過咗指定金額，獲贈四個 Vinylmation「型」像。

然後，去到上星期六，我去樂園玩嘅時候就拎咗其中兩個 Vinylmation 入去，打算交換。最後我就響嗰日展開咗首次 Vinylmation「型」像交換！以下呢兩個 Vinylmation 就係嗰日嘅收穫！

講到 Vinylmation，我第一次買 Vinylmation，係因為樂園推出呢兩隻 Duffy迪士尼小熊「型」像！

而當時仲做緊特別推廣，買任何 Vinylmation 會送多一個指定嘅「型」像，於是我就擁有咗四個...

第二次買「型」像，係俾「奇妙處處通 會員獨家」呢個賣點吸引，嗰陣係首次出現會員獨家商品。

而家我一共擁有九個 Vinylmation，其中有六個都係免費獲得嘅，只得三個係真係俾錢買！樂園經常送出 Vinylmation「型」像，係唔係代表呢個系列嘅銷情並唔係咁理想呢？

依我所知道，其實 Vinylamtion 響美國嗰邊亦都冇徽章咁受歡迎，可能都仲需要多啲時間推廣。不過，佢地都推出過好多好得意嘅 Vinylmation，有部份我都幾喜歡，不過都係睇下好啦...

我諗 Vinylmation 未能成功吸引Fans們，最主要嘅原因，係因為比起徽章難儲好多...  交換徽章，我地可以好方便咁將徽章放響一條掛繩上，一次過展示哂，而 Vinylmation 就唔得啦；另外，每套 Vinylmation 一共有十二款，先撇開十二個嘅價錢，要搵齊咁多個都有一定嘅難度。所以我暫時都唔會太投入於收集 Vinylmation，用免費嗰幾個交換就可以了，哈哈！