前兩日就講到我去咗機場展望台，嗰一日，我另外仲去咗一個地方，就係 香港濕地公園！記憶中我好似曾經去過濕地公園兩次，不過都已經係幾年前，呢排有時間，所以就再去睇下！
通往訪客中心嘅長廊，有好多銅像，全部都係可以響濕地可以搵到嘅動物，又或者係候鳥。
訪客中心呢到有幾個展館，於是我打算睇哂展覽先至出去戶外；一入到大堂就可以睇到熱帶魚！
其中兩個展覽，分別與濕地動物以及人類文化有關；咦，麥兜 都黎咗濕地公園參觀喎！
而我最喜歡嘅展覽，就係呢個 濕地直播室！因為有一個好有趣嘅互動元素，令參觀者更加投入！
究竟有咩咁互動呢？就係可以俾我地化身成為記者！響展覽入口，可以領取一張記者證進行遊戲！
拎住呢張證，可以去到展館內不同嘅關卡，依照指示完成任務；去到展覽最後仲會有表現報告！
呢個展館嘅主題係環繞著人類活動對濕地環境所造成嘅影響，做任務之前記得要先去採訪一下啊！
參觀展覽期間，我都發現到呢到嘅展品都花咗好多心思去製作，好靚之餘亦好有意義！
好啦，參觀完展覽，響訪客中心望下出面嘅情況先！嗯，冇落雨，咁就等我出去睇下啦！
濕地公園嘅戶外部份，面積非常廣闊，有好多野睇；可以響自然環境中散下步，都幾舒暢！
公園裡面有一個好大個嘅人工湖，有橋橫跨去另一邊，湖邊亦有荷花等等嘅小植物。
行完人工設計嘅地方，就去到真正嘅濕地！有一條浮橋，可以響上面仔細欣賞紅樹林嘅生境！
另外亦有好幾個大大小小嘅觀鳥屋，可以響入面好寧靜咁睇下雀仔，其中一間仲係三層高嘅添！
我響觀鳥屋入面睇咗一陣，見到一隻雀仔響岸邊搵緊野食，之後仲發現泥灘上面有好多蟹仔啊！
生活響香港呢個咁繁忙嘅城市，平時真係冇咩機會去郊外行下、感受一下大自然...能夠響空閒時間去到自然環境散下步，整個人靜落黎，細看周圍嘅景物，感覺真係幾舒服架！
沒有留言:
張貼留言