仲夏夜「奇」薈 - 奇妙的晚上, 盡情享受樂園魔法...

為答謝多年來長期支持樂園嘅 奇妙處處通 會員，香港迪士尼樂園 於8月30日、31日特別舉行 仲夏夜「奇」薈 活動。合資格嘅會員需要響指定期間內登入會員專頁進行登記；雖然登記過程有啲阻滯，開初搞咗接近兩個鐘都登記唔到，好彩之後都登記成功。其實今次係我第一次參加園方舉辦嘅同類型活動，所以就算登記時遇上麻煩，當日都無阻我興奮嘅心情！

我登記嘅活動日期係8月30日，活動容許我帶一位朋友一齊參加，嗰日我地大約中午12:00已經到咗樂園！迎樂路 設立咗指示牌話俾我地知道活動證件換領處嘅位置，今次活動好似好認真喎！

終於去到換領處拎咗活動證件啦！領取證件同時會附有一份活動時間表以及一張免費雪條換領卷；本身登記嘅會員更加會獲得一個紀念徽章！

園方早前都有響會員專頁宣佈，參加活動嘅會員，不論係本身登記抑或陪同參加，活動當日都可以獲得商品七折優惠。響全日任何時段，只要到任何商品銷售點出示活動證件，就會有優惠。

繼續睇下活動時間表，一揭開，就見到「奇妙的一夜，由此打開」嘅字樣。而裡面就顯示所有特別表演時間同埋 迪士尼朋友 見面時間。呢晚嘅活動將會有三個表演：奇妙今晚夜、獅子王慶典、怪獸大學啦啦隊。

至於嗰個紀念徽章，以深藍色做主色，上面印有「Appreciation Evening」仲夏夜「奇」薈 英文名稱，並且有 奇妙處處通 會員專享嘅標誌。我自己就覺得個徽章幾靚嘅，同埋有禮物收令我感到好驚喜！

呢一日除咗有特別活動，對於 奇妙處處通 會員嚟講，仲有一樣特別事項！就係 大冒險家餐廳 終於都有會員折扣優惠啦！我響下午首先食咗日式燒八爪魚丸，晩餐就食咗韓式牛仔骨套餐！當然亦都唔少得特飲 藍莓奧祕！

食飽飯，開始享受奇妙嘅一夜啦！由下午八點正開始，整個樂園就變成 奇妙處處通 會員獨享啦！我睇嘅第一個表演於故事劇場演出，就係 奇妙今晩夜！其實我唔明點解個名咁搞笑，不過入場後都覺得場面好隆重！舞台兩旁嘅螢幕以及布幕上都可以見到 奇妙處處通 標誌！演出開始之前又幫 Duffy 影返張相先！

開始表演啦！首先就有一班舞蹈員載歌載舞，為 奇妙今晚夜 揭開序幕！跟住就輪到兩位司儀出場！請留意一下男司儀，覺唔覺好似有啲熟口熟面？好似響某個地方見過咁嘅？哦！咪係某位爵士嘅其中一個子侄囉！

開場白過後，兩位司儀就邀請在場會員歡迎 香港迪士尼樂園 行政總裁 金民豪先生！佢嘅演講辭總括黎講就係感謝會員們一直以來嘅支持，亦希望大家未來會支持落去，成為樂園嘅一份子。話時話，今次好似係我第一次親身見到金生。

繼續欣賞表演！同平時嘅 米奇金獎音樂劇 一樣，奇妙今晚夜 將整個演出分成不同場景，不過就係為今晚特別設計嘅。總共有三個以 迪士尼 動畫為題材嘅場景：《小泰山》、《美女與野獸》、《獅子王》。備註：場景《美女與野獸》雖然獻上電影內嘅歌曲，不過出場嘅係穿著盛裝嘅 米奇、米妮。

而響每個場景嘅間隔，兩位司儀都會同會員們玩玩有獎問答遊戲，都係一啲與 香港迪士尼樂園、奇妙處處通 有關嘅問題。大家每當聽到問題之後，就會即刻舉手搶答，場面非常虛撼！

整個演出大約歷時45分鐘，黎到最後一幕，一位女歌唱員在台上獻唱；其實表演中嘅大部份歌曲都係由佢唱出，佢嘅歌聲好有力量，令人引象深刻！

響歌聲之中，布幕再次升起，舞蹈員又再出場。同時間，米奇家族 八位成員：米奇、米妮、唐老鴨、黛絲、高飛、布魯托、鋼牙奇奇、大鼻帝帝，一齊由劇場嘅後面逐漸步向舞台，散發星光！一連串舞步之後，奇妙今晚夜 演出正式結束！

睇完表演，就要去下一個項目啦！仲夏夜「奇」薈 其中一個矚目點，就係會有不同 迪士尼朋友 現身同會員們見面！既然係咁，事前我就專登買咗一本 八週年簽名簿，打算響呢一晚收集  迪士尼朋友 嘅簽名！

第一位遇上嘅 迪士尼朋友，係首次於 香港迪士尼樂園 裡面同大家見面嘅 艾利奧！佢嘅魚尾經已變成咗雙腳，能夠響陸上生活，唔知佢開唔開心呢？見到佢，我當然都要拎簽名啦！簽名被泡沫包圍，充滿海洋嘅感覺！今次係我第二次拎到 艾利奧 嘅簽名，你估唔估到我之前響邊到拎過呢？

之後所遇上嘅 迪士尼朋友，係電影《鐘樓駝俠》嘅女主角：Esmeralda！佢拎住咗自己嘅鈴鼓，仲不斷敲打節奏添！又係時候要拎簽名啦！佢嘅簽名好有性格呢！

搜索咗兩個簽名，但係我發現，時間好唔足夠！大部份 迪士尼朋友 都有好長嘅隊列，要拎簽名就要排好耐隊...  我惟有決定放棄拎簽名呢個任務，只係響旁邊影下佢地啦...  當晚仲見到 皮諾丘 與 蟋蟀占美尼、黃金服飾 米奇 與 米妮、以及 小熊維尼 與 跳跳虎。

其實當晚亦有另一啲 迪士尼朋友 出咗黎，但因為時間關係，我冇去搵佢地；而我最後亦冇睇到其餘兩個表演，選擇響寧靜嘅樂園裡面散下步、玩下遊樂設施。其中一個奇妙時刻，就係穿過 睡公主城堡！或者你會諗，成日都會穿過架啦，有咩咁特別？但係，當晚能夠近距離地觀賞亮起燈光嘅城堡，真係一種好夢幻嘅感覺！

只要樂園開放，幾時去玩遊樂設施都冇問題，咁究竟有咩遊樂設施係專登要響今晚玩嘅呢？就係 小飛象旋轉世界！我已經好耐冇坐過 小飛象 翱翔天際啦！佢嘅等候時間往往都好長，所以我平時就算想玩都唔會去玩；今晚完全唔使排隊，好正啊！飛上半空，細看 幻想世界 嘅夜景，又係一個奇妙時刻！

另一個我去咗玩嘅遊樂設施，就係 迷離大宅。呢一晚去玩其實冇咩特別原因，只係純粹想去就去。除咗陪我參加活動嘅朋友，亦有另外兩位朋友一齊黎到 迷離大宅；後面無人排隊，我哋最後每人各自霸咗一架電磁箱車，哈哈！展開迷離旅程之餘，我都有為 Duffy小熊 影相，認唔認得出呢個係大宅裡面邊一個部份呢？

黎到 迷離莊園，順便響園區嘅小食亭換埋枝雪條；我最鍾意食嘅係黑加倫子啫喱冰，但係因為價錢，又係已經好耐冇食過...  呢晚有得免費換黎食，好開心！

頭先提及到，所有參加活動嘅會員，全日都會有七折購物優惠，我梗係唔會執輸！我總共買咗三包徽章，全部都係 米奇表情系列！呢個系列總共有十款徽章，全部都係 米奇老鼠 嘅表情，以包裝發售；每包內藏兩個徽章，要打開先至知道係咩款。買咗三包，再同朋友們交換一個徽章，我已經擁有七個不同嘅款式啦！

買完徽章，活動時間都差唔多完結啦！臨走前，影下 美國小鎮大街 百貨店 外面嘅商店櫥窗啦！八週年櫥窗裡面有 米奇、米妮；怪獸大學櫥窗就有 向左和向右！所有櫥窗都好靚！

搞下搞下都已經係晚上11:30，要返屋企休息啦！登上 迪士尼線 列車，Duffy小熊 坐咗落黎，但係佢依然唔捨得除低活動證件呢！相信佢今晚一定玩得好開心，渡過咗一個奇妙嘅晚上！

今次，園方專誠為 奇妙處處通 會員舉辦特別活動，更加為此而延長樂園時間，的確值得雀躍！當然，亦要感謝一眾演藝人員，去到咁夜都依然為我地提供完美嘅遊園體驗！奇妙得以延續，有賴樂園每一份子嘅努力；亦正如 金民豪先生 所講，我深信，樂園支持者、Fans們也是包含其中...