海上傳幸福: 充滿歡欣的小型表演!

繼續有 東京迪士尼之旅2013 嘅文章！東京迪士尼樂園 三十週年係整個渡假區共同慶賀嘅盛事，今次就同大家分享 東京迪士尼海洋 其中一樣 幸福歡樂年 特別項目：Happiness Greeting on the Sea 海上傳幸福！

呢個項目其實係一個小型海上表演，響園區 地中海港灣 對出海面進行；呢到可以清楚望到 東京迪士尼海洋 嘅地標，Mount Prometheus 火山。

演出開始，一眾 迪士尼朋友 出場啦！佢地著住金光閃閃嘅服飾，企響花船上向大家揮手！呢架船都設計得幾靚，整架船佈滿代表幸福歡樂嘅 米奇 汽球，船頭亦有三十週年標誌！

米奇、米妮 好興奮喎！當時係我第一次見到佢地著住呢套三十週年服飾，所以我都好興奮！突然，米奇 叫我地豎起耳朵聽一聽，究竟想我地聽咩呢？

轟隆一聲，原來係 Mount Prometheus 爆發啊！火山頂處噴出一道火焰，非常有氣勢！睇黎佢都想同大家打個招呼呢！

感受完火山嘅氣焰，再望返海上嘅 迪士尼朋友！嘩，係我最愛嘅 Duffy迪士尼小熊！佢同好朋友 ShellieMay 響到玩緊喎！好可愛！

花船上仲有一位我喜愛嘅 迪士尼朋友，唐老鴨！但係 黛絲 就唔響佢身邊...  唔知去咗邊呢？另外仲有 布魯托、高飛，總共七位 迪士尼朋友。

花船響海面航行咗一陣，表演就完結了，過程唔算好耐。知道表演完結，我即刻衝咗去一個特別嘅位置，打算見證著佢地離開。

其實我身處嗰個位置嘅底下就係通往後台區域嘅水道，所以響返返入去之前，迪士尼朋友 都會望上黎，同所有人講再見！

雖然略嫌短咗少少，不過能夠有一個小型表演俾我地見到著住三十週年服飾嘅 迪士尼朋友，都係一件幾開心嘅事！幸福歡樂年，果然係充滿歡欣呢！