2013年9月12日 - 歡騰的八週年, 樂園處處享奇妙!

呢一日，香港迪士尼樂園 裡面充滿著一種溫馨的感覺，樂園Fans們以及一眾演藝人員響園內共同感受愉悅嘅一日！因為，我地嘅神奇王國八歲生日啦！驟眼睇，看似係平凡嘅一日；事實上，奇妙星粉經已響不知不覺間散播到每個人嘅心中...  我同朋友好早就已經到咗樂園，時間大約係早上09:00，我地響閘前慢慢等待樂園正式開放...

就到10:00，有一架車駛出黎，原來係 米奇、米妮 啊！佢地響車上不斷同大家打招呼！

佢地落車準備主持樂園開放典禮；睇下佢地套衫！已經換上全新萬屋節服飾啦！

樂園開放典禮過後，佢地行去上車，之後就返去樂園裡頭，等待大家一陣去搵佢地！

隨著 米奇、米妮 離開正門廣場，樂園開放啦！為慶祝八週年，所有入場賓客都會獲得紀念襟章！

除咗紀念襟章，唔好唔記得攞埋樂園時間表；封面圖片係 米妮 拎住汽球，慶祝樂園嘅八歲生日。同時，亦有新一期樂園指南登場，封面圖片依然係 怪獸大學，但係點解呢？招收怪獸大學生 活動唔係已經完咗啦咩？謎底將會響稍後揭曉。

拎齊樂園指南、樂園時間表、紀念襟章，我地第一時間衝去搵 米奇、米妮！佢地分別舉起四隻手指喎！4+4=？哦，原來係八週年嘅意思！

順便都要欣賞一下佢哋嘅萬聖節新裝！今年呢套衫以金色、黑色為主，佢地嘅高帽以及頭飾上面分別有一個「M」字，代表「Mickey」同埋「Minnie」。

好啦！係時候要解謎啦！究竟點解樂園指南嘅封面仲係 大眼仔、毛毛？我地黎到 動畫藝術廊！咦，等等先，見唔到 動畫藝術廊，只見到 怪獸大學行政大樓！實情係咁嘅，雖然夏日活動 招收怪獸大學生 結束咗，但係行政大樓就得以延長辦公時間，直至今年 迪士尼黑色世界 活動完結為止；響呢段期間，各位新生可以繼續辦理學生證。再睇真啲，原來行政大樓亦都出現咗微妙嘅變化喎！

就響樂園八週年嘅呢一日，黎自 怪獸大學 嘅學生現身於 香港迪士尼樂園，一同參加我地嘅生日派對！親臨樂園嘅就包括 啱Key會 全體成員，同埋屬於 至嚇會 嘅 變色龍、大舊。

係我鍾意嘅 向左和向右！可以響園內見到佢地，好開心！我可唔可以走埋去成為佢地嘅第三個頭呢？

值得一提嘅係，現時 啱Key會 成員嘅位置正正就係 大眼仔、毛毛 先前同大家影相嘅位置。呢個位嘅正上方，原本係展示 向左和向右、阿拱 嘅背影，但係佢地而家已經響大樓外面現身，所以而家就變成 大眼仔、毛毛 嘅背影，意味著之後只可以響大樓裡面見到 大眼仔、毛毛 啦...

就算 大眼仔、毛毛 唔會再出黎同大家影相，不過各位怪獸Fans都唔需要感到失望，因為佢地兩位響大樓裡面擺好新嘅姿勢，期待與你見面！就到萬聖節，當然要嚇嚇人啦！

離開 怪獸大學行政大樓，我地黎到 美國小鎮大街 百貨店！適逢八週年，不如買啲紀念品返屋企，令自己可以永遠記得呢個咁特別嘅日子啦！因為我有生日月份折扣優惠，我同朋友就響店內不斷揀，最後竟然逗留咗接近一個半小時！呢段時間所換黎嘅，就係一大袋戰利品！

買完野，響樂園裡面遊走，周圍影下相，轉眼間就到咗下午...  迪士尼飛天巡遊 要開始啦！

主角出場！花車上層，米奇 一邊跳舞一邊接受大家嘅歡呼！而花車下層嘅其他 米奇家族 成員都顯得非常興奮，就算入到後台，佢地都仍然望返出黎，好似好唔捨得同大家講再見！

接著落黎有 小熊維尼 以及 迪士尼公主！響八週年呢個大日子，睇黎佢地亦都覺得好開心呢！

歡樂氣氛尚未完結！仲有其他黎自森林嘅 迪士尼朋友 同埋 奇妙仙子，向著大家熱情地揮手！

我知道參與巡遊演出嘅演藝人員一向都好落力，務求為大家送上最完美嘅表演；辛苦哂！

黎到尾聲啦，最後一架花車都返返入後台...  好多謝你地為大家送上一場令人深刻嘅巡遊表演！

繼續響大街上踱步，偶然間遇上了鋼琴師；佢為我地演奏動聽嘅樂曲，又係一個奇妙時刻呢！

講咗咁耐，好似黎黎去去都只係停留響 美國小鎮大街...  但係，奇妙時刻點會只係局限於大街呢？呢一日所遇到嘅另一個奇妙時刻，發生於 灰熊山谷！當時正想行去 迷離莊園，步行中再次見到一對老鼠情侶，米奇 更加向我嘅鏡頭揮手呢！

咦，太陽開始落山啦...  咁代表啲咩呢？迪士尼黑色世界 即將啟動！下一篇文章將會繼續同大家分享！

最後，再次祝 香港迪士尼樂園 生日快樂！唔知由八歲轉到九歲嘅過程中，又會有咩重要嘅事發生呢？