Tho's Dreams: 來到漁村碼頭, 與 Duffy迪士尼小熊見面!

上次就講咗東京迪士尼海洋 My Friend Duffy 表演，今次，等我帶大家嚟到劇場旁邊嘅小碼頭！碼頭固然係用嚟上船嘅地方，但我嚟並唔係要坐船！Cape Cod 地區係一個 Duffy迪士尼小熊專屬嘅小漁村，所有野都同 Duffy 有關，呢個碼頭當然亦都同 Duffy 有關聯！進入等待區，就可以見到頭頂上面掛滿 Duffy 紙牌！

呢度有一個招牌寫住「Cape Cod Village Greeting Place」，代表碼頭經已被改裝成與 Duffy迪士尼小熊見面嘅地方。不過，一啲原有嘅碼頭擺設，改裝後都有被保留落嚟。例如牆上就掛有魚形裝飾，同埋航海地圖。

見到呢個魚形裝飾，再次提醒大家 Cape Cod 係一個漁村，漁民每日就係響呢個碼頭啟程出海捕魚，遲啲會有文章進一步講述呢個故事。

事實上，Cape Cod 係一個真正存在嘅地方，位於美國嘅東北面，因為形狀似鱈魚而得名。而呢幅地圖所顯示嘅，正正就係真正嘅 Cape Cod。值得一提嘅係，幻想工程師響設計東京迪士尼海洋呢個版本嘅 Cape Cod 嗰陣，特別將佢嘅形狀設計到同真正 Cape Cod 差唔多，都係半環繞著海洋。

以上係呢個碼頭原本已經有嘅裝飾，但係當 Duffy迪士尼小熊黎到 Cape Cod，呢到特別為佢進行改裝，並帶來好多同佢有關嘅新裝飾！我第一樣見到嘅，就係一個木櫃！仔細睇真啲木櫃裡面嘅物件，有好多迪士尼朋友嘅相片，亦都有一本紀錄冊。

Duffy 嘅故事本身就講到米妮製作咗一隻小熊，佢會盛載著米妮嘅愛意，伴隨米奇出海探險，而呢隻小熊就係 Duffy 啦！當米奇、Duffy 出海嘅時候，佢地除咗會去探訪朋友仔嘅家園之外，更加會邀請朋友仔一齊返去 Cape Cod，參觀返佢地自己嘅家鄉！呢啲相片就係阿拉丁、茉莉公主、史高治叔叔、艾利奧來到 Cape Cod 嗰陣影嘅，相片中都可以見到 Cape Cod 嘅建築物。

朋友仔響 Cape Cod 參觀過後，就會黎到呢個碼頭上船離開；臨走之前，都會響紀錄冊寫低感受，並且感謝 Duffy、米奇嘅款待！阿拉丁、茉莉公主就留低咗咁嘅字句「Thank you for showing us Cape Cod Village, it's a whole new world!」「謝謝帶我們來到 Cape Cod 漁村，這裡仿如一個新的世界！」

繼續望下周圍嘅裝飾，由碼頭裡面望返出外面，見到有啲旗幟掛咗響到。講到旗幟，你會諗起啲咩呢？會唔會係國旗呢？我原本都以為呢啲係國旗，但之後諗諗下，我從來冇見過任何國家嘅旗幟係呢幾個樣式嘅，於是我又向另一個方向諗。

米奇、Duffy 會坐船出海探險，Cape Cod 又係一個漁村，理應會有好多漁船；響船上掛上旗幟，會唔會有咩特別作用呢？事實上，船隻響海上航行嘅時候，會利用旗幟向其他船隻發出不同嘅信號；例如會有旗幟代表「我們的船經已完全停下」，亦有旗幟代表「我們的船出現故障，要求支援」等等，呢個通訊方法叫做國際海上信號旗 International Maritime Signal Flags。

不同樣式嘅旗幟會有不同嘅意思，同時亦有不同嘅代號，又舉個例，Mike 就係「我們的船經已完全停下」嘅代號。旗幟代號就係我地要搵嘅要點！Cape Cod 碼頭掛有七支旗幟，佢地嘅代號分別係 Echo、Mike、Oscar、Charlie、Lima、Echo、Whiskey。將每個代號嘅首個英文字母抽出黎，就係 EMOCLEW！吓？呢堆係咩黎架？唔好唔記得，我係由裡面望出去嘅，所以我呢個角度係掉轉咗次序，所以要掉返轉：WELCOME，就係歡迎嘅意思！

望返去碼頭入面，又有另一個木櫃。呢個木櫃放咗幾套小熊服裝，各有特式。原來，Duffy 黎到 Cape Cod 之後，佢已經融入咗呢到，與村民們融洽地相處。之後，村民更加為 Duffy 特別舉行一個服裝設計比賽，參賽者會為 Duffy 度身訂造新服裝，得獎作品就會放響呢個木櫃裡面。假如我係一位 Cape Cod 村民，我都一定會參加呢個比賽，親自為 Duffy 設計服裝！

講到融入 Cape Cod，碼頭裡面都仲有其他裝飾，同大家講述 Duffy迪士尼小熊降臨 Cape Cod 嘅故事。以前，Cape Cod 只係一個寧靜嘅小漁港，村民過著簡樸嘅生活；但自從 Duffy 黎到之後，呢隻會帶來歡樂、幸運嘅小熊令呢到變得充滿生氣！碼頭嘅告示板釘滿 Duffy 與村民嘅合照，可見佢已經成為村民生活中不可或缺嘅一部份。

剛才講到，Duffy 受歡迎嘅程度，甚至令到 Cape Cod 會為佢專登舉辦服裝設計比賽，但係特別活動唔止一項！另外仲有一年一度嘅 Duffy野餐同樂日！總而言之，Duffy 就令到 Cape Cod 滿佈歡樂！諗返轉頭，響現實中，東京迪士尼海洋呢個 Cape Cod 原本都只係美國海濱 American Waterfront 某個平凡嘅角落；但自從園方將呢到改裝成 Duffy 集中地，Cape Cod 從此變得不再平凡，充滿生氣，滿佈歡樂！咁咪同 Duffy 降臨 Cape Cod 漁村嘅故事一模一樣？

講咗咁多小故事，為大家送上一張有趣嘅圖片啦！呢到放咗六個 Duffy 紙藝作品，顯示佢不同表情嘅模樣，分別係：Hello 你好、Thinking 思考中、Being Silly 傻傻的、Whispering 悄悄話、Hello Again 再說你好、Smiling 歡笑。咁多個表情之中，你又最鍾意邊一個呢？

好啦，我要收拾心情，準備與 Duffy迪士尼小熊見面啦！呢到嘅招牌都幾精緻，展現不同嘅 Cape Cod 建築物，同時亦有「We are all daffy for Duffy!」橫額，意思即係「我們都為了 Duffy 而狂迷！」咁我都會承認自己係一位 Duffy 狂迷嘅，哈哈！

終於見到 Duffy 啦！佢著住咗春日巡航服裝同我見面！佢用亮晶晶嘅眼睛望住鏡頭好可愛啊！響 Cape Cod Village Greeting Place，除咗 Duffy 之外，仲可以見到佢嘅好朋友：ShellieMay。響普通日子，ShellieMay 通常會響碼頭旁邊嘅戶外位置同大家見面，但係響春日巡航期間，就會改為響碼頭裡面現身；不過 Duffy 同埋 ShellieMay 係唔會同時出現嘅，如果要見哂佢地兩個，就要響不同嘅時間排隊。

順便講埋，東京迪士尼渡假區其實有好嚴謹嘅影相規定；就算你排咗好耐隊，都規定每個人只可使用自己嘅相機與迪士尼朋友影一張相。如果要影好似上面嗰兩張 Duffy、ShellieMay 獨自擺甫士嘅相片，就代表你冇得走埋去同佢地合照。我想影甫士，又想合照，但係唔想兩次隊，咁點算呢？有關規定只係對使用自己嘅相機作出限制，一個精明嘅做法係：用自己部機影咗甫士，然後就請攝影師用園方相機影合照，最後就買張合照返黎！