環繞 香港迪士尼樂園渡假區, 走遍每個角落...

早幾日前就同大家去咗 香港迪士尼樂園酒店，分享趣緻可愛嘅 迪士尼朋友 造型點心。今日，我將會再次帶領大家離開樂園，不過就唔係淨係去酒店咁簡單...

其實，我有一個小習慣；假如入去樂園玩嘅時候遇著係係比較多人嘅日子，有時我會選擇遠離繁囂，靜靜地行去酒店區。響今年暑假嘅某一日，我做咗一個更誇張嘅嘗試，就係環繞整個 香港迪士尼樂園渡假區 行一圈！

睇睇路線圖！由樂園正門出發環繞整個渡假區，將會先後經過 迪士尼碼頭、香港迪士尼樂園酒店、迪士尼好萊塢酒店、迪欣澳活動中心、迪士尼站，最後就會再次返到去樂園正門，完成旅程！

當日，我係響 迪士尼飛天巡遊 以及 米奇水花巡遊 之間嘅嗰段時間出發，大約係響下午3:00開始行；穿過正門嘅閘口，就去到米奇 滑浪噴水池。

向左？向右？平時響樂園行出嚟，會向著左手邊行過去，到 迪士尼站 乘搭港鐵離開；但係，今次我走向右手邊，去到 迎樂路 嘅另一個路段。

呢條小路人煙稀疏，冇咩人經過...  相信，假如要去酒店區，大部份人都會選擇乘坐穿梭巴士，而唔係行路過去。唔知呢條路幾時先至會繁華起黎呢？

唔單止寧靜，呢度仲有好多優雅嘅裝飾；水柱高低舞動，池中的水不斷流動。響咁悠閒嘅環境之下，整個人都可以平靜落黎。

接近盡頭，右邊有一條分叉路喎！呢條路係可以通去 香港迪士尼樂園酒店 嘅，不過我決定唔行呢到，繼續向前走步向海邊！

一路行之餘，仲要望下燈柱上嘅招牌，有好多響園內比較少見嘅 迪士尼朋友！當中，有一隻全身黑色嘅羊仔，我一直都唔知佢係邊個，幾經搜尋後，得知佢叫做 Danny！

到達 迪士尼碼頭！呢到依然係幾乎一個人都冇，渡輪時間表依然係冇任何顯示...  呢個碼頭其實設計得好靚，盡頭仲有一個燈塔！望向遠方，更加可以隱約地見到市區！可惜，呢到經已被遺忘...

響海傍小徑漫步，行到去 香港迪士尼樂園酒店，再次黎到華麗嘅大堂！暑假嗰陣時，商店外面嘅櫥窗係八週年佈置，上星期去嘅時候就已經變成萬聖節佈置了！

唔逗留咁耐啦，始終我今次嘅目標係要行完一整圈！同埋要響 米奇水花巡遊 開始前返到去！離開 香港迪士尼樂園酒店，沿著 神奇道 前進！

下一站係：迪士尼好萊塢酒店！突然記起，上年響呢到過咗一個好奇妙嘅生日！然而，我今次並無入去故地重遊，因為...  時間的確非常緊迫！要繼續行啦！

講到整個渡假區最少機會行到嘅路段，應該都係由 迪士尼好萊塢酒店 行去 迪欣湖活動中心 嘅呢一段，平時最多只會坐穿梭巴士經過。原來，呢到有一個後台車輛入口。

前面睇黎有啲唔同喎，整到好似一條橋咁嘅？等我望望橋下有啲咩先！大件事，唔夠高添！唔緊要，我跳高黎睇！喔，係路軌喎！呢到就係 神奇道 以及 迪士尼線 交界嘅位置！

終於都黎到路線圖嘅第五個地點：迪欣湖活動中心！行咗一段頗長嘅路，開始有啲攰...  但係我唔可以停落黎，緊接落黎要行返去樂園，我要睇 米奇水花巡遊！

之前曾經有一段時間成日都黎 迪欣湖活動中心，呢段路經已行到熟哂！穿過隧道，響 幻想道 向前行，見到旅遊巴停車場就經行人路走入去！

返到黎熟悉嘅 迪士尼站 外面！時間已經係下午4:00，衝啊！又再見到 米奇 滑浪噴水池，都唔理啦，衝啊！我嘅一圈就響匆匆忙忙嘅情況下完結...

好彩，我返到入樂園嘅時候，第一架花車都未到 美國小鎮大街...  最後，我當然同 米奇 好開心咁大玩水花啦！行咗一個鐘，好熱，而家可以降降溫，啱哂！

環繞整個 香港迪士尼樂園渡假區，比起我原本所預計嘅時間耐，最尾搞到好似好趕咁...  跟住我又響到諗，響香港行一圈需要一個鐘，咁如果係 東京迪士尼渡假區 呢？人地有兩個主題樂園、多間酒店、商場，究竟要行幾耐呢？或者我下次去嘅時候可以黎一個終極挑戰，哈哈！