節奏強勁的百老匯式歌劇 - Big Band Beat

我突然發現，今次去 東京迪士尼渡假區嘅四日入面，我都花咗好多時間去睇表演；而今晚就想同大家分享一個響 東京迪士尼海洋 上演嘅百老匯式歌劇 Big Band Beat！

呢個表演嘅中文譯名叫做 動感大樂團，一聽個名就知道會係一個充滿活力嘅表演！其實呢個表演係有兩位朋友響我去之前推介俾我嘅，佢地話表演期間有一幕非常精彩，所以一定要去睇下！於是，我就去咗位於 美國海濱 大都市入面嘅 百老匯音樂劇場 欣賞 Big Band Beat！

入到去劇場嘅大堂，都幾華麗，而牆上亦有好多同海洋有關嘅壁畫。呢個劇場分開咗做兩層，由大堂直接行入去就係一樓，二樓就需要使用大堂兩旁嘅樓梯行上去，而我今次坐嘅係二樓。

開始表演啦！不過好老實講，我覺得表演嘅前段比較沉悶，亦唔算多 迪士尼朋友 出場...  我一直所期待嘅，就只係剛才所講嘅精彩一幕，最後，終於來臨啦！米奇 手執鼓棍，敲起爵士鼓，敲出強勁嘅節奏！佢好有型啊！

演出完結之後，我先知道，原來劇院裡面係唔影得相嘅...  平時嘅我，會好乖咁刪返哂影咗嘅相，但今次我真係唔捨得刪除咁型仔嘅 米奇 啊...  大家千祈唔好學我，入到去要乖乖地唔好影相啊！

表演大約係三十分鐘，睇完之後，出返嚟又影下個招牌先！轉眼間，天空都已經黑哂啦，咁就係時候食少少野，食完之後又要準備睇下一個表演啦！

總括黎講，我自己就的確覺得呢個表演一般，只係 米奇 嗰幕嘅情緒比較高漲。假如你問我值唔值得去睇，我會話，時間容許的話都可以去睇下嘅，但假如只會響 東京迪士尼海洋 玩一日，我就覺得去玩另一啲野仲好...

而欣賞呢個表演都有一個小貼士，就係有關座位安排。劇場分為一樓、二樓，其中一樓嘅座位係需要抽籤嘅 ( 每日首場演出除外 )，如果想追求好啲嘅座位，演出前就需要去指定嘅地點抽籤，過程有啲似拎Fastpass，都非常方便快捷。但唔需要坐靚位、坐二樓都冇所謂的話，就唔需要去抽籤，直接響演出前去到劇場就可以了，不過就要留意可能會滿座。而呢個抽籤安排亦都有可能會取消嘅，我去睇嘅嗰日係全日都冇抽籤，唔知係唔係同入場人數有關；想知道當日有冇得抽籤，就記得要問問演藝人員啦！