唔好意思啊，過去幾日都冇出文章... 迪士尼黑色世界2013 都快將結束啦，但係活動正式開始之後我好似都冇同大家作出分享，今晚就先出返篇同活動有關嘅文章！至於《黑色異幻》故事，我都好努力趕緊工，我會響萬聖節來臨之前寫完佢架啦！
迪士尼黑色世界2013 響10月4日正式開始，逢星期四至日舉行，直到10月31日。響活動日子去樂園玩的話，入場嘅時候會獲得一本「好玩唔好叫 忍叫手冊」；裡面印有不同「好玩唔好叫 樂園黑點」嘅資料，亦都有不同黑點嘅標誌貼紙，挑戰過後就可以貼響指定位置，證明自己挑戰成功！
另一方面，樂園再次響活動期間為 奇妙處處通 會員送上獨有禮物！今次係一個「好玩唔好叫 忍叫口罩」！雖然我一直都覺得今次嘅活動主題唔太吸引，但係呢份禮物又設計得幾得意！我響樂園裡面玩嘅時候都有戴住，哈哈！
響試玩夜嘅時候就知道，米奇、米妮、奇奇、帝帝 會響有活動舉行嘅晚上於 幻想世界 同大家見面，Duffy、高飛 亦會隨機出現。咁其他 米奇家族 嘅成員呢？點先可以見到穿著萬聖節服飾嘅佢地？不論有冇活動舉行，佢地都會響早上於 美國小鎮大街 現身！但係有一個問題，除咗 米奇、米妮，其餘三對 迪士尼朋友 係隨機出現嘅，所以，要影齊佢地真係一啲都唔簡單；就算不斷入園，都要視乎好唔好彩！
活動開始後，園方亦特別響十個「好玩唔玩叫 樂園黑點」設置告示牌，方便識別。佢地分別係：驚心動魄太空山、迪士尼朋友 鬼馬相聚、大頭寶寶、沖天搖控車、玩具兵團跳降傘、迷離莊園、黑色馬戲班、黑色嘉年華「異」演、灰熊山極速礦車、詭墳學院。再次可以見到好靚嘅黑點標誌！
太陽落下，黑夜降臨，殭屍狼人又再響 美國小鎮大街 開戰！因為我本身係鍾意 殭屍黨 多啲，所以我往往都係響佢地嗰邊睇，而我今次竟然心血來潮去咗 狼人族 嗰邊睇！其實我真係好鍾意呢個表演，或者佢唔算好長，上年亦已經睇過好幾次，不過嗰種緊湊嘅氣氛真係令我覺得好吸引！
一個完美嘅 迪士尼黑色世界 晚上，又點少得 夜光鬼魅巡遊！我同 Duffy 都好乖，好早就坐低響巡遊路線起點嘅附近，靜候 阿積 帶領巡遊隊伍出場！響起點睇完之後都未係好滿足，於是又即刻行落去巡遊路線終點睇多次，嘿嘿！
係時候開餐啦！自從 大冒險家餐廳 有咗會員折扣之後，假如我要響園內食晚餐，佢都會係我嘅首選！上次就去咗試下佢地嘅蛋包飯，又估唔到幾好味喎！呢個套餐包含前菜、咖哩蛋包飯、雞腿、雞扒、以及飲品一杯。講到飲品，我當然又係叫咗特飲：藍莓奧秘！丫，應該係 藍莓精靈 先至啱！因為 阿積 經已入侵到飲品裡面，所以都要配合一下改改名！
最後，為大家送上一幅商店櫥窗嘅 查立保 相片，作為呢篇文章嘅終結。唔知大家覺唔覺得呢篇文章好似唔係講得太多野，仲要冇講過我最愛嘅 黑色嘉年華「異」演，邊有可能？其實係因為我想開一篇獨立文章俾呢個我最愛嘅「好玩唔好叫 樂園黑點」，而我稍後亦都會有多一、兩篇專題文章去講其他活動項目，希望我寫得切啦！>_<
I do like the Halloween event!!!
回覆刪除