東京迪士尼樂園 嘅七個主題園區，之前嘅文章入面已經出現咗六個。而呢篇文章就係關於後嘅一個主題園區，卡通城 Toon Town。
叫得做 卡通城，入面就當然係設計到好似一個卡通世界咁啦！呢個小型 卡通公園 Toon Park 入面啲擺設好得意啊！係卡通版嘅小動物！
呢架賣野食嘅小食車都係有卡通化架！車牌就係 米奇 個名，同埋佢嘅生日日期，11月18日。
響呢個屬於 米奇家族 佢地嘅小鎮中間，豎立咗一個 米奇銅像噴水池。
米奇家族嘅成員都有佢地自己嘅屋企架！先去睇下 米奇公館 Mickey's House。屋頂上面有個 卡通城 嘅招牌。入面係可以同 米奇 影相嘅，不過太多人排隊，我冇入到去。
間屋嘅前面有一個郵筒，仲係以用返 米奇 自己個臉型黎設計架！
屋外嘅花園就有 米奇 同埋 布魯托 嘅園藝擺設。
呢到仲泊咗 米奇 架車！唔知大家有冇響卡通片入面見過呢？
去到 美妮公館 Minnie's House 啦！( 佢地官方唔知點解譯咗做 美妮，唔係用 米。)
屋外同樣有一個以 米妮 臉型黎設計嘅郵筒以及一棵 米妮 園藝擺設。
屋後有一個後花園，花園內有一個愛情之井，米妮 佢真係好重視愛情架！
屋內就有一啲平常嘅傢俱同埋擺設，當然都係有卡通化啦！
引起我注意嘅，就係一張桌上放咗 米奇米妮 佢地嘅情侶相，同埋一束由 米奇 送嘅花啊！
之後就到 唐老鴨 啦！不過佢嗰到唔係一間屋，而係一架船。
船頭有一個 黛絲 塑像，好搞鬼啊，哈哈！
呢到亦有 唐老鴨 同埋 黛絲 嘅園藝擺設。
呢間 唐老鴨汽船 Donald's Boat 船上係一個小型嘅兒童遊樂地帶，有滑梯等嘅設施。至於船嘅周邊就有一啲小瀑布，而欄杆亦都配合返主題，係由救生圈組合而成架！
咦！船嘅對面有一棵好大棵嘅橡樹喎！你估唔估到邊個住咗響入面呢？
哈哈，當然就係兩隻花栗鼠啦！呢到就係 奇奇帝帝橡樹屋 Chip & Dale's Treehouse。
同之前各個 迪士尼朋友 嘅屋企一樣，樹屋外都有 奇奇帝帝 嘅園藝裝飾。
睇下！樹上有幾多橡果！佢地將呢到變咗做一個橡果工場，仲有工作表添！另外，橡樹嘅底下亦有一啲用黎處理橡果嘅器材，攪動一下，就會有花生醬嘅味道噴出！
係時候入去佢地間樹屋入面啦！個門口好細，配合返佢地細細粒粒嘅身型。我地咁大舊，就要用另一個門口入去啦！
屋入面掛咗佢地張相，亦有花生醬、牛油等嘅食材放咗響到。
去返樹屋出面，發現欄杆上有一個個嘅橡果做裝飾，好得意。
而 高飛 間屋就因為進行緊粉飾，所以冇開到，今年8月24日先會重新登場。經過粉飾後，呢到將會變成 高飛遊漆屋 Goofy's Paint & Play House，應該係可以響入面畫畫。
卡通城 主要分咗做兩部份，一邊係以上 米奇家族 嘅小鎮，另一邊就係城中心。城中心呢邊有一間城鎮會堂；我地 美國小鎮大街 嗰間就係服務中心，但呢間就只係一個裝飾。
城中心呢邊亦有一間商店，我仲發現，原來間商店本身係一間工廠黎架！呢到係專門用黎製作一啲小工具嘅，啲 米奇手套 經過部製造機之後，就會拎住啲小工具！
呢篇文章講嘅主要都係 卡通城 入面嘅佈置，但呢到唔係只係睇野嘅；城中心入面有一個大型室內遊樂設施，米奇小鎮 嗰邊亦有一個小型過山車，之後會再分享。如果俾你入住 卡通城，響呢個卡通世界入面生活，你又會有咩感覺呢？
沒有留言:
張貼留言