回想上年去 東京迪士尼海洋，因為得半日時間，為咗爭取遊玩時間，有好多野都需要取捨... 而其中一樣，就係佢地獨有嘅水上巡遊：密西哥傳奇 Legend of Mythica。平時響 香港迪士尼樂園，或者其他 迪士尼主題公園，我地通常都只會睇到響陸地進行嘅巡遊；但係黎到 東京迪士尼海洋，佢地嘅巡遊表演係響海面上進行嘅，演出地點再次係 地中海港灣 園區嘅對出海面。今次去玩，時間咁充裕，冇理由唔睇掛？
本身我就唔係好知道個故事係講咩嘅，只係睇得出同神話傳說應該有啲關係... 寫呢篇文章之前去咗官方網站睇下，故事其實係講緊：好耐以前，一班傳奇嘅珍禽異獸響離開人類世界嘅時候，遺留咗一把魔法鎖匙，假如人類可以解開鎖匙嘅封印，呢班珍禽異獸就會重現於人類世界！而黎到今日，我地將會響 東京迪士尼海洋 合力解開魔法鎖匙之謎！
演出開始嗰陣，一個基座出現於海面嘅正中心，並且噴射出幻化多變嘅水花效果。
突然，一位女祭司從基座升到半空，佢將會主持整個祭典；佢出場嘅一刻更加有煙花效果！
祭司指示幾位龍使者響海面上行駛；佢地高速移動、濺起水花，為祭典揭開序幕！
之後，就有更多花船駛到海面上，每一架都以一種動物做主題；例如，紅色嗰架係鷲鷹、藍色嗰架烏龜、黃色嗰架係公羊，仲有另外兩架，不過因為分散於海面不同位置，我影唔到...
呢個時候，迪士尼朋友 都響花船上面現身啦！當中，紅色鷲鷹花船就係 米妮 嘅舞台！
原來，每一位 迪士尼朋友 都象徵著一種能量來源，米妮 代表「愛」，高飛 代表「歡樂」，唐老鴨 代表「探險」，其餘我冇影到嘅就係分別代表「真誠」、「友情」嘅 布魯托 以及 奇奇、帝帝。
只要集合所有能量來源，就有機會可以解開魔法鎖匙嘅封印！但係，又點可以冇咗我地嘅主角，米奇？海洋中心嘅底座不斷向高空延伸，最後，米奇 就響最頂點出現！佢代表「想像」嘅能量來源！
不過，並唔係集齊所有能源就必然可以解開謎團，仲需要藉助所有人嘅力量！所以，環繞大海行走咗一陣之後，花船亦慢慢駛近岸邊，停泊響指定嘅位置...
泊好船，迪士尼朋友 就會行上岸，同大家一齊載歌載舞！我附近嘅位置咁啱就係 奇奇、帝帝 嘅演出位置！歌舞成功帶動現場嘅氣氛，各個能量來源再配合觀眾嘅力量，究竟會發生咩野事？
響呢一刻，每一架花船上面都出現咗一位女神！咁係唔係表示，我地經已成功...？
睇睇海面！冇錯，我地成功咗啦！我地終於打開咗傳說嘅大門，珍禽異獸重現於人類世界！
成功召喚珍禽異獸，密西哥傳奇 嘅表演都黎到尾聲啦... 於是，我又跑咗去後台入口水道嘅位置，見證佢地離開... 去到嘅時候，飛馬、三頭龍入緊後台，而佢地已經進入咗沈睡狀態... 哈哈！
三頭龍呢架花車嘅最後部份，有一條美人魚呢！見到佢嘅服飾咁靚，令我再次睇返咁多幅影咗返黎嘅相，原來呢個表演好多演出者嘅服飾都好靚，並且包含有關傳說嘅元素，非常特別！
其他花船都陸續離開，迪士尼朋友 知道呢個位置有好多人等緊佢地，所以都望上黎同大家道別！
所有花車都入哂去，去到最尾，原先響海洋中心嘅基座亦都移入後台。
米奇 企咗響上面等緊同我地揮手啊！米奇，多謝你為我地獻上咁精彩嘅表演，我地下次再見啦！
沒有留言:
張貼留言