見證聖誕樹重拾光采, 實現心底裡的聖誕願望!

今晚係除夕夜，2013年將要完結，唔知你會選擇響邊到迎接新嘅一年呢？不論響邊到倒數，相信今晚都必然會係一個美麗嘅晚上！講到美麗嘅晚上，響 迪士尼雪亮聖誕2013 活動期間，香港迪士尼樂園 嘅每個晚上都變得格外幻麗！因為入夜之後，美國小鎮大街 將會上演一個閃耀璀璨嘅聖誕節亮燈儀式：大街閃雪亮燈！

雖然呢個表演已經重覆咗好幾年，但黎到今時今日，我每一次入園玩都會堅持睇埋呢個表演先走，因為整個感覺實在係太奇幻啦！過去兩年我都有寫文章去講述呢個表演，踏入第三年，我決定再次為 大街閃雪亮燈 寫一篇新文章！今次，我將會去齊 美國小鎮大街 嘅兩端為大家直擊整個 大街閃雪亮燈 嘅流程！

黎到傍晚，大街閃雪亮燈 快將開始！望一望棵聖誕樹，只係得暗淡嘅燈光，咁樣點得架？所以我地就要藉著呢個亮燈儀式為佢帶黎光采！

大街閃雪亮燈 正式開始之前，有 香港迪士尼樂園 聖誕詩歌合唱組 為所有人送上動聽嘅聖誕樂章，而現場嘅聖誕氣氛亦頓時變得更加濃厚！

合唱完畢後，大街閃雪亮燈 再過幾分鐘就會開始！鏡頭一轉就去到大街嘅另一端，一班表演者穿著華麗嘅服飾，手持雪花燈柱，響 廣場飯店 旁邊準備就緒啦！

星星閃爍嘅聲音響遍整個 美國小鎮大街，建築物上嘅燈光不停跳動，意味著 大街閃雪亮燈 要開始啦！表演者一個一個走到街上，響整條大街嘅正中位置排開，由街尾慢慢延伸到聖誕樹！稍後，佢地會運用雪花燈柱，將一個最浪漫迷人嘅情景呈現出黎！

同時間，米奇、米妮、高飛 企咗響馴鹿花車，去到聖誕樹下同大家見面！花車停定之後，米奇 就話：「嘿哈！大家都有一個想響聖誕節實現嘅願望！同我地一齊數到三，實現願望啦！」

一、二、三，神奇嘅事情發生啦！整條大街嘅燈光完全熄滅，表演者嘅雪花燈柱逐一亮起！光芒一點一點傳到去聖誕樹，並且啟動咗最奇妙嘅冬日魔法...

就響呢一刻，聖誕樹就好似被賦予生命力一樣，不斷發出色彩繽紛嘅燈光！大街嘅兩邊噴發出煙火，雪花燈柱開始閃動，慶祝聖誕樹重拾美麗嘅模樣！

最後，不論係聖誕樹抑或雪花燈柱，都以最完美嘅姿態示人！現場嘅所有人都沉醉於眼前嘅景色當中，相信，呢個將會係聖誕節最難忘嘅一刻！

亮燈過後，馴鹿花車環繞 小鎮廣場 一圈，然後再駛入後台；沿路上，米奇、米妮、高飛 繼續向不同嘅人揮手，睇黎佢地都因為聖誕節嘅降臨而感到雀躍！

一部份嘅表演者跟響馴鹿花車嘅後面，跟隨 米奇 返回後台；至於另一批表演者，就轉身走向街尾，行返去 廣場飯店 嘅旁邊再進入後台。

整條大街雪花紛飛，係名副其實嘅 聖誕小鎮！走到聖誕樹下，除咗拍照留念之外，或者你會發現，冬日魔法經已響不知不覺間實現咗你嘅聖誕願望...