又試好耐都冇出過 東京迪士尼之旅2013 嘅文章，對上一篇已經係好耐之前... 繼續落去的話，可能真係下年再去嗰陣都未寫完... 希望唔會啦！呢一篇文章將會同大家繼續留響 東京迪士尼海洋，分享佢地嘅大型夜間表演：Fantasmic!
轉眼間，太陽已經落咗山；黎到夜晚，你會唔會覺得 Prometheus火山 比起日間更有起勢？
Prometheus火山 底下嘅海面將要上演一場幻麗嘅奇妙表演，而主角就係：魔法師米奇！因為主角係我愛嘅 魔法師米奇，所以我一直都好有興趣想睇呢個表演！東京迪士尼之旅2012 因為響傍晚就要離開 東京迪士尼海洋，所以無緣欣賞呢個表演，黎到2013年終於有機會睇啦！
講返少少背景資料先，Fantasmic! 原先係響美國兩個 迪士尼樂園 所上演嘅水上表演，直至2011年先至響 東京迪士尼海洋 上演全新版本。表演一開始，魔法師米奇 企咗響一頂巨型魔法帽嘅頂端，運用自己嘅法術指揮水花效果，佢仲邀請埋一班 魔法掃把 朋友們一齊幫手！
之後，米奇 就帶我地暢遊神奇嘅 迪士尼世界！我地首先黎到森林！一眾森林動物出黎舉行一個充滿活力嘅派對，佢地載歌載舞，好開心呢！咦，辛巴、彭彭 都有現身喎！
跟住就去到 迪士尼 嘅愛情世界，巨型魔法帽展示出不同公主們嘅動人故事，海面上亦有一支支燭台浮動著... 真係一個浪漫嘅情境，讓人沉醉其中...
突然，一下調皮嘅笑聲響遍全場，係 史迪仔 啊！佢跳咗上巨型魔法帽嘅頂端，向大家揮手；唔通，佢想取代 魔法師米奇 嘅位置？
當然，米奇 唔會容許 史迪仔 繼續搗亂；趕走咗 史迪仔 之後，米奇 以為一場混亂經已過去... 不過佢錯啦，更可怕嘅事情將要發生！有一塊魔鏡響不知不覺間出現咗，仲趁 米奇 唔為意嘅時候將佢吸咗入去，唔俾佢出返黎！
原來係 邪惡女王 連同其他 迪士尼大壞蛋 密謀造反！凶悍嘅壞蛋們相繼現身，究竟點算好啊！
惡夢延續，黑巫婆 將自己化身成魔龍，噴出火焰，誓要大肆破壞！面對咁樣嘅情形，被封印嘅 魔法師米奇 點樣先至可以拯救所有人、拯救我地嘅 迪士尼王國？
唔洗怕，只要有想像力，冇野可以難到我地！終於，憑著自己內心無限嘅想像力，魔法師米奇 手執魔法棒，將所有壞人擊退！回復和平，眾多經典 迪士尼朋友 都齊集響海面上，慶祝之餘亦感謝 米奇 為我地所付出嘅一切！
黎到表演尾聲，魔法師米奇 返到去巨型魔法帽嘅頂端；經過呢次不平凡嘅經歷，佢全身發出亮麗嘅光芒！最後，佢再一次施展法術，揮動魔法棒造出火光，為 Fantasmic! 呢個表演劃上句號！海面上，巨型魔法帽依然聳立，似乎係 米奇 專登留俾我地，話俾我地知道：魔法的確存在...
我去嗰日，Fantasmic! 係響晚上8:00開始嘅，整個表演大約歷時20分鐘；完結之後，晚上8:30好快又會有另一個表演開始，就係三十週年煙花表演，Happiness On High 幸福滿夜空！稍後將會有另一篇文章再同大家分享。:)
請緊記，只要充滿想像力，再施展些少魔法，任何事都可以成真！Will you believe in magic?
沒有留言:
張貼留言