香港迪士尼樂園 今年嘅農曆新年活動經已響前日正式開始，以「樂園無界 福氣無限」為主題，象徵農曆新年福氣傳遍整個樂園嘅各個園區。但事實上，園方都只係將原有嘅園區遊樂設施配上新年主題重新包裝，除咗 美國小鎮大街，其他園區實際都冇任何新年佈置。
農曆新年活動再次只係局限響 美國小鎮大街，同時間，活動內容亦相對較少；同上年一樣，活動期間並冇任何特別嘅節日表演，只係街上放咗一啲中式裝飾；不過值得慶幸嘅係，今年 迪士尼朋友 所穿著嘅新年新裝都設計得幾靚！米奇 已經急不及待要向所有人展示佢套新衫啦，就等我地一齊去睇下啦！
米奇、米妮 兩位老鼠明星繼續響 小鎮廣場 同大家見面。米奇 農曆新年新裝以紫色為主，配以金色長褲；米妮 條裙就分有粉紅色、橙色上下兩種主色。
仔細啲睇的話，可以見到整套服飾都特別加入咗唔少中式元素，相信花咗唔少心思去設計。
而前日係活動開始日，米奇、米妮 首次穿著呢套新衫登場，吸引咗好多人跟實佢地！
之後就到 唐老鴨、黛絲，個人覺得今次呢個系列嘅新裝之中，唐老鴨 嗰件係最搶眼嘅，因為用咗湖水藍色，好特別！至於 黛絲 條裙就大致上同 米妮 差唔多。
唐老鴨 一如以往都係咁調皮，仲響到搶鏡頭添啊！就連 黛絲 都冇佢辦法！
接著落黎嘅係 高飛、布魯托！高飛 嘅新衫用咗橙色做底色，再加一件紫色背心；布魯托 就戴咗一頂紫色中國帽過新年，其實佢仲有一個充滿中國特式嘅狗牌，不過佢成日遮住咗，我影唔到...
兩隻狗仔響呢一日都好興奮，跳跳扎扎！
鋼牙奇奇、大鼻帝帝 新裝係用綠色做主色，佢地嘅頭上亦都戴咗中國帽；原本覺得佢地戴帽剩係戴一隻耳仔好似怪怪地，不過睇睇下又覺得咁樣幾可愛！
唔知大家留唔留意到，米奇家族 每位男性角色嘅衫上面有不同顏色嘅方塊花紋，佢地頂中國帽嘅正中間亦有一個 米奇「福」字標誌。
我最愛嘅 Duffy迪士尼小熊 都有新衫著啊！呢套係 香港迪士尼樂園 首次為佢自家設計嘅服裝，以黃色、淺藍色為主色，上面亦有唔少 隱形米奇。
Duffy 行返去後台入口嘅時候仲特別俾咗個近鏡我影，好開心！
同 迪士尼朋友 玩往往都係最愉快最奇妙嘅時刻，大家都快啲趁住響活動期間，入去樂園搵佢地，同佢地過一個喜氣洋洋、福氣無限嘅農曆新年啦！
I have met Duffy!! :)
回覆刪除