先前嘅 東京迪士尼之旅2013 相關文章都係逗留響 東京迪士尼海洋，黎到旅程嘅第二日，早上依然會響 東京迪士尼海洋 遊玩，但去到下午就會正式轉場去到 東京迪士尼樂園！想睇有關 東京迪士尼樂園 嘅資訊的話，就記得繼續留意住啦！
第二日嘅朝早，響 東京迪士尼海洋海景酒店 好舒服咁訓咗晚，雖然比起平日訓少咗，但總算補充咗精神！我仲特別預早咗起身，去到酒店嘅外圍睇睇！
起身之後，沖個靚涼，跟住就幫我嘅 Duffy小熊 換衫！佢今日所穿著嘅係春日巡航裝，配合返 東京迪士尼海洋 嘅特別活動，米奇和Duffy的春日巡航 嘛！
開始去玩之前，當然都要食早餐先，如果唔係邊有力氣？有飯糰、溫泉蛋、朱古力飲品！其實，響 東京迪士尼渡假區 裡面嘅大部份時間都係我自己去玩，爸爸媽媽就會出返市區行街；今日嘅早餐就係佢地尋晚響出面嘅便利店幫我買定嘅。
如果唔係因為分秒必爭，我都會選擇響房內嘆返杯茶先出發，佢地連個杯都雅致過人！試想像，手上拎住茶杯，品味溫暖嘅紅茶，再欣賞窗外嘅風景，都應該會幾寫意！
走出房間沿著走廊行，尋晚太攰唔記得影相，趁住而家影返先！牆上裝有古典燈飾，亦都有海景畫作，依然係充滿意式風情；而行到去走廊嘅盡頭，望落去，正正就係酒店大堂！
好啦，出到去外圍，呢到就係酒店嘅正門。可以見到後面嘅主體建築，一排意大利風格樓房向兩邊延伸，每棟樓房嘅設計、色調都略有不同，唔會太過單調。中心有一個魚型石像噴水池，我會話係呢間酒店嘅象徵性標誌，響官方網頁睇啲圖片成日都會見到佢。
不論遠睇抑或近睇，都會睇到整間酒店嘅造工係非常細緻；另一個令我好鍾意呢間酒店嘅原因係，佢同平時 迪士尼 嘅童話式主題好唔同，古典意大利港灣主題令 東京迪士尼海洋海景酒店 變得份外獨特，同時亦不失華麗嘅感覺！
酒店正門旁邊有通道通往一條天橋，究竟係去邊嘅呢？原來係去 迪士尼渡假區線 東京迪士尼海洋車站，酒店住客要去坐搭單軌鐵路都非常方便。
搞下搞下，原來已經係早上8:30，今日 東京迪士尼海洋 同尋日一樣都係響早上9:00開門，差唔多時候要排隊入園玩啦！再次去到樂園正門，使用酒店住客專用嘅排隊隊列，都係可以提早20分鐘入園！第二日，我入園之後會衝去邊到呢？下篇文章繼續分享！
It's really luxury~~:)
回覆刪除