東京迪士尼之旅2014: 尋覓Oswald幸運兔子

東京迪士尼渡假區 春季活動「迪士尼復活節」以及「米奇和Duffy的春日巡航」今日正式開始，但係尋日已經進行咗不同巡遊表演、娛樂節目嘅預演。另一方面，原先預定4月2日登場嘅 Oswald幸運兔子，亦已經響尋日歷史性首次現身於 東京迪士尼海洋，同賓客見面！

東京迪士尼海洋 為佢設計咗一個全新嘅主題故事，講述佢去到 Cape Cod 漁村，設立咗一個小型農場，為村民提供鮮花、雞蛋等等。又係 Cape Cod 漁村，咁即係可以響同一個地區搵齊 Duffy迪士尼小熊 同埋 Oswald幸運兔子，好方便啊，哈哈！

請容許我不厭其煩咁重複多次 Oswald 嘅背景資料：華特迪士尼先生 響1927年創作咗 Oswald幸運兔子 呢個角色，並推出過幾齣短篇動畫。可惜之後因為版權爭議，華特迪士尼先生 喪失咗呢隻幸運兔子嘅擁有權，Oswald 亦被逼離開 迪士尼 嘅大家庭。

直到2006年，華特迪士尼公司 主動回購 Oswald幸運兔子 嘅擁有權。2010年，東京迪士尼樂園 推出全新復活節巡遊，Oswald 首度以巡遊花車型式出現於 迪士尼主題公園。可惜，一直以黎都未有關於 Oswald 以「Meet & Greet」造型與賓客見面嘅消息。

去到大約一個月前，有傳聞指出 Oswald 會響 東京迪士尼海洋 春季活動之中首度曝光，呢個傳聞亦都響 東京迪士尼渡假區 官方網頁公佈春季活動詳細內容嘅時候得以證實！最終，Oswald幸運兔子 終於響2014年4月1日首次出現響賓客眼前！

而配合 Oswald幸運兔子 登場，園方同時推出一系列 Oswald 主題商品；以藍白間條水手風格為題材，恰配返 Cape Cod 嘅漁村氣氛；有頭飾、帽子、短襪等服裝。

另外亦有背囊、輕型儲物包、毛公仔鎖匙扣、原子筆呢類飾物，全部都設計得好靚，有返 東京迪士尼渡假區 一貫嘅商品質素！好想全部買哂返黎啊！

順帶一提，日本迪士尼商店 超受歡迎嘅「Tsum Tsum」毛公仔系列，最近又推出咗 Oswald幸運兔子 迷你毛公仔；睇黎，Oswald 近期可以話係登上人氣高峰！

Oswald幸運兔子 作為第一位由 華特迪士尼先生 創作嘅 迪士尼朋友，適逢 迪士尼 90週年，今次推出 Oswald「Meet & Greet」造型，或者就係最好嘅慶祝禮物！今年 東京迪士尼之旅2014，就等我親身去到 東京迪士尼海洋，尋覓可以帶來幸運嘅兔子！期待與 Oswald 見面嘅一刻！