戴上帽子, 讓自己也化身成幸運兔子吧!

趁住近期 Oswald幸運兔子 備受矚目，等我順便同大家分享埋一啲 Oswald 相關商品啦！上年去日本旅行嘅時候我都買咗幾隻 Oswald 毛公仔，之後有朋友去咗加州嘅 迪士尼樂園渡假區，我就拜託佢幫我空運一款飾物返嚟，就係 Oswald 兔子耳朵造型帽！

呢頂帽以黑色為主色，頂端有長長嘅耳朵，正前方亦釘有一個 Oswald幸運兔子 標記。

嗰邊都有個人化服務，可以加自己個名上去；但原來係要收費嘅，不過繡得咁靚，都值嘅！

除咗 Oswald 帽子，我嘅朋友返嚟嘅時候仲帶咗一份小禮物俾我，係一個 Oswald 鎖匙扣！上面寫住「Service with a smile」以微笑服務，提醒咗我自己都要用微笑向賓客傳播歡樂，我會記住架啦！:)

背後就印有 Disney California Adventure 迪士尼加州冒險樂園 標誌；再次感謝呢位朋友，去美國玩都專誠買一份小禮物俾我，我好鍾意啊，多謝您！

講完美國嘅商品，返到黎 香港迪士尼樂園，自從上年推出過徽章之後，好似已經再見唔到任何 Oswald幸運兔子 商品...  近期，Oswald 終於再次出現，園方推出咗一件 Oswald T恤！

等陣先，呢隻明明係 Mickey 黎架喎，邊到有 Oswald？玄機係響背面！

呢件T恤有前後兩邊圖案，前面係 Mickey，後面就係 Oswald 拎住一個寫住「The Original」嘅牌；意思係 Oswald 說明自己先至係原創，暗諷 Mickey 係以佢為設計藍本先至誕生；哈哈，真係調皮！

其實，呢件T恤並唔係 香港迪士尼樂園 嘅自家出品，係由美國嗰邊運過黎嘅；不過點都好，起碼有得賣丫；希望之後會有更多 Oswald幸運兔子 商品響園內出現，如果係香港自家設計就更好啦！