雖然話就話轉場去咗 東京迪士尼樂園，但其實同 迪士尼朋友 玩咗冇耐之後就離開咗樂園，因為要去酒店辦理入住手續！尋晚響 東京迪士尼海洋海景酒店 好舒服咁住咗一晚，而今晚就輪到 東京迪士尼樂園酒店！
踏出樂園正門之後，可以見到 迪士尼渡假區線 車站，而後面嗰座藍色屋頂嘅建築物就係我即將入住嘅 東京迪士尼樂園酒店！其實距離樂園都唔算好遠，就算夜晚玩到好攰，都只需行幾步路就返到去！
呢間酒店用咗幾個經典 迪士尼 動畫作品做主題，其中一個係《愛麗絲夢遊仙境》；一入門口經已發現好多相關佈置，包括馬賽克壁畫、撲克牌畫作等等。
行到去酒店大堂，正中央有一個小型噴水池，奇妙仙子 企咗響水池頂端呢！冇錯，另一個動畫主題就係《小飛俠》！牆上亦有展示幾張電影劇照，小飛俠 帶領小朋友們翱翔天際！
除咗有經典動畫主題，東京迪士尼樂園酒店 亦採用維多利亞式建築風格；酒店裡面周圍都係華麗嘅古典擺設、畫作，氣派非常瑰麗高貴。
維多利亞式建築風格？咁咪即係同 香港迪士尼樂園酒店 一樣囉？兩間酒店嘅風格係一樣嘅，自然都有一啲類似嘅裝飾，吊燈、米奇銅像、米妮銅像，全部都俾我熟悉嘅感覺！
講完佈置就要講下酒店設施，同 東京迪士尼海洋海景酒店 嗰邊一樣，呢到都有一間售賣樂園商品嘅店鋪，同樣有售賣酒店獨家商品。
但我最滿意嘅係，呢到有便利店！價錢只係比起市區嘅便利店貴少少，亦有一啲帶有 迪士尼 元素嘅貨品！究竟點為之有 迪士尼 元素嘅貨品？遲啲先講，嘿嘿！
最後，送上一張地板嘅相片；話哂都係 迪士尼酒店，點會冇 隱形米奇 呢？剩係呢到已經一次過有四個！不過我之後冇再特別花心機去搵更多 隱形米奇，因為實在有太多野等住我去做... 哈！
沒有留言:
張貼留言