遊走 東京迪士尼渡假區, 尋找不同 迪士尼朋友!

2014年4月15日，東京迪士尼樂園 三十一週年啦！雖然遲咗三日，不過都祝賀 東京迪士尼樂園 生日快樂！呢篇文章係 東京迪士尼之旅2013 遊記當中首次提及 東京迪士尼樂園，而且係同 迪士尼朋友 有關！點解我會選擇講 迪士尼朋友 呢？咁係因為，我一入場，響正門廣場已經有多位 迪士尼朋友 出現，所以 東京迪士尼樂園 俾我嘅第一印象就係 - 迪士尼朋友！

其實 東京迪士尼渡假區 都出咗名係有好多 迪士尼朋友，而最吸引人之處，係大部份 迪士尼朋友 都係可以隨意走動，並唔係固定響某個位置俾你排隊影相。所以，只要你走埋去就可以同佢地影相，但當然都要顧及其他賓客，互相尊重。

見到眾多 迪士尼朋友，我第一時間就買咗本簽名簿，打算收集佢地每一個嘅簽名！園內商店都有售賣不同款式嘅簽名簿，我就揀咗以下呢款：封面由多位 迪士尼朋友 組成，背面印有 東京迪士尼渡假區 標誌，並附有一支簽名筆，筆面展示各個 迪士尼朋友 簽名，好靚啊！

同樣地，只要行埋去有禮貌地咁遞上簽名簿、簽名筆，迪士尼朋友 都好樂意幫你簽名！其實在場都有唔少Fans會收集 迪士尼朋友 簽名，不過大家都一個接著一個咁埋去，好守秩序！咁究竟我收集咗幾多簽名呢？以下就同大家逐個逐個睇下啦！

剛才提及到，一進入 東京迪士尼樂園 正門廣場，迪士尼朋友 經已隨處可見，我諗當時起碼有十個以上！之後再行入少少，去到 世界市集 嘅天幕底下，又可以見到更多 迪士尼朋友！呢兩個地點就係 東京迪士尼樂園 園內最多 迪士尼朋友 出現嘅集中地。

Eeyore -《小熊維尼歷險記》

Piglet -《小熊維尼歷險記》

Mr. Smee -《小飛俠》

Alice - 《愛麗絲夢遊仙境》

Bernard -《救難小英雄》

Miss Bianca -《救難小英雄》

Scrooge McDuck -《唐老鴨俱樂部》

Friar Tuck -《羅賓漢》

Fairy Godmother -《灰姑娘》

其他主題園區都會有少量 迪士尼朋友 偶然出現，但我去嗰陣好多時都有落雨，所以佢地冇出黎，最後只係響 西部世界 影咗一位 迪士尼朋友...  不過講到我嘅最大遺憾：最尾嗰日我終於響 幻想世界 遇上我所愛嘅 小飛俠，但係大排長龍！因為唔夠時間，只能擦身而過...

Wendell -《鄉村頑熊劇場》

至於 東京迪士尼海洋，迪士尼朋友 集中地同樣係正門廣場，主要有 米奇家族 著住充滿海洋元素的服裝同大家見面；另一方面，地中海港灣 亦有來自《木偶奇遇記》嘅一眾角色出現，原因之前都講過，因為呢個園區同埋呢齣動畫都係以意大利作為故事背景。

Daisy 黛絲

John Worthington Foulfellow -《木偶奇遇記》

其他 迪士尼朋友 亦都散佈響不同主題園區，但我覺得最驚喜係響 發現港 呢個未來港口遇上兩位超級英雄：超能先生、超能太太！原本我以為 超能太太 會簽「Mrs. Incredible」，點知佢最後簽咗自己嘅原有名稱，彈弓女俠「Elasticgirl」。

Pluto 布魯托

Miss Bunny -《小鹿斑比》

Mr. Incredible -《超人特攻隊》

Elasticgirl -《超人特攻隊》

剛才俾大家睇嘅，都係一啲可以隨意遊走嘅 迪士尼朋友；而 東京迪士尼海洋 園內都有一啲類似 香港迪士尼樂園 夢想花園 嘅拍照景點，迪士尼朋友 會逗留響固定位置，賓客需要排隊等候。其中一個叫做 迎賓小徑，位於 失落河三角洲；米奇、米妮、高飛 會響叢林中嘅一個角落同大家見面。

高飛 Goofy

另一個就係位於 美人魚礁湖，響海底世界究竟可以見到邊個？當然就係美人魚公主 艾莉奧！佢將會響屬於自己嘅 迎賓洞窟 等待所有人嘅到訪！我覺得呢到嘅佈景都幾靚幾優雅，洞窟外面流水淙淙，而 艾莉奧 就響洞內坐咗響一個貝殻上面。

好啦，兩大主題樂園嘅 迪士尼朋友 現身位置都講完，最後就同大家分享一項關於酒店住客嘅資訊！先前提及過，迪士尼酒店 嘅住客係可以提早入場，而嗰段期間同時亦係酒店住客同 迪士尼朋友 嘅獨家會面時間，多位 迪士尼朋友 都會現身於兩個樂園嘅正門廣場！

當一到咗樂園開放時間，響其他一般賓客正式入場前，佢地就會返返去後台，之後先至會偶然出現。呢個獨家會面時間簡直可以完全滿足特別鍾情於 迪士尼朋友 嘅Fans們！我去之前都唔知道會有咁嘅安排，所以當時都感到非常意外；所以話，奇妙，就係響你意想不到嘅一刻送上驚喜！