迪士尼渡假區線, 展開充滿歡樂的旅程!

想去 東京迪士尼渡假區 裡面嘅不同位置，最方便嘅方法必然就係乘坐 迪士尼渡假區線 單軌鐵路。我足足響渡假區逗留咗四日，期間都坐過唔少次單軌鐵路。坐響充滿 迪士尼 元素嘅列車入面，睇睇窗外嘅風景，話咁快就到達目的地，都真係幾舒服！

要坐列車當然要有車票，東京迪士尼海洋海景酒店 以及 東京迪士尼樂園酒店 會為住客響住宿期間提供免費車票，所以我頭三日都可以免費乘坐 迪士尼渡假區線；至於最後嗰日，我就買咗一日車票。三日免費車票同埋一日車票都有三十週年特別設計，用完之後都可以拎返屋企收藏。

第一日我全日都留咗響 東京迪士尼海洋，去到第二日下午先至轉場過去 東京迪士尼樂園，於是就去 東京迪士尼海洋車站 坐單軌鐵路啦！

其實響 東京迪士尼之旅2012 嘅時候都已經分享過 迪士尼渡假區線，所以我今次 東京迪士尼之旅2013 就唔詳細講啦，直接放相片啦！

適逢 東京迪士尼渡假區 盛大舉行三十週年慶典，迪士尼渡假區線 都有配合；月台閘門上面貼滿 幸福歡樂年 嘅佈置，大大個三十週年標記隨處可見。

有車啦，啟程前往 東京迪士尼樂園車站，旅途中唔少得為自己嘅 Duffy小熊 影返張相！佢仲發現到，望出窗外會見到我地尋晚所入住嘅 東京迪士尼海洋海景酒店！

到達車站，2012年黎過，2013年就有一種重回舊地嘅感覺...  而今次再黎，我亦都發掘到上次冇留意到嘅有趣事物，原來車站外圍印滿 東京迪士尼樂園 各個主題園區嘅畫作！

世界市集、幻想世界、明日世界、探險世界、西部世界、動物天地、卡通城，有齊七個園區！至於最後一張畫作就顯示入夜後響 灰姑娘城堡 上空發放煙火嘅情景！

仔細諗返嗰四日，我真係搭咗好多次 迪士尼渡假區線，我諗應該有十次以上。例如，第二日傍晚時分我由 東京迪士尼樂園車站 搭返過去 東京迪士尼海洋車站，只為買返一張自己同 Duffy迪士尼小熊 嘅合照！之後隨即又搭去 渡假區正門車站，去咗 迪士尼商店 買野！

講起 渡假區正門車站，2012年嘅時候都講到呢個車站有好多裝飾，包括 東京迪士尼渡假區 完整地圖畫作、單軌鐵路資訊牌、迪士尼渡假區線 圖畫等等。

但點解要再次提起 渡假區正門車站 嘅裝飾呢？因為... 呢到今年有矚目嘅 幸福歡樂花圃！米奇、米妮 身穿列車制服，響花兒之間一同慶祝 東京迪士尼渡假區 三十週年！

好啦，下篇文章終於終於都正式開始講 東京迪士尼樂園 啦！東京迪士尼之旅2014 仲有兩個月就會啟航，即係我仲有兩個月時間去完成所有 東京迪士尼之旅2013 遊記，究竟最後我會唔會成功呢...？