第三個重點遊樂設施，就係 明日樂園 嘅 怪獸公司迷藏巡遊車 Monsters Inc. Ride & Go Seek！睇個名就知道，佢係 怪獸公司 做主題啦！而佢亦係我去樂園之前一直最想玩嘅遊樂設施！亦因為咁，當日樂園一開門，我就衝去玩佢！一黎最想玩，二黎遲少少的話就要排好耐隊！
實在係太心急啦，日頭都唔記得影個門口添，不過唔緊要，好彩夜晚有影返！入口大大個招牌，上面有 大眼仔、毛毛、Boo 三位主角，整個招牌亦呈現一個M字。
入口呢到亦有一個大鐘，鐘嘅上面亦都有 怪獸公司 嘅標誌架！
整座遊樂設施嘅建築物，亦都特別參照咗電影入面原本嘅模樣，但當然就縮咗水啦。
至於門口亦都係參照返電影，呢個亦係我鍾意佢嘅原因之一，就係將電影場景化為真實！
返返去朝早啦，因為一早衝去呢到，所以就唔需要拎 Fastpass 啦。佢地好得意，叫正常排隊線做 StandbyEntrance 後補等待入口，但明明呢個先係正常入口嘛！
無論係響室外定係入到去等待區入面，周圍都有不同嘅海報。
一入到去等待區，我嚇呆咗！因為佢係將電影中整個 怪獸公司 大堂呈現返出黎，好正！
天幕牆上有兩幅壁畫，一邊係人類世界地圖，另一邊就畫咗 怪獸公司 嘅運作情景。
大堂中心嘅地板上，亦刻上 怪獸公司 嘅標誌。排隊線仲特別係圍繞住呢個標誌，俾你睇清楚！
電影入面，大眼仔 女朋友 大眼妹 工作嘅位置，大堂接待處。
等待區內有好多電視，向你介紹一陣間嘅玩法，但都係日文。順帶一提，一陣入到去，真正坐車玩嘅時候，途中所有 迪士尼朋友 都係講日文嘅。=_=
上車啦！原來我地做咗 怪獸公司 嘅保安人員！另一樣我鍾意呢個遊樂設施嘅原因，就係佢有互動性。大家可能睇得唔太清楚，但車頭座位前兩支細細支嘅野，其實係電筒黎嘅。入到去嘅時候，周圍都會有 怪獸公司 頂工作帽，只要照一照帽上嘅標誌，就會有趣嘅事發生！
臨入去之前，影多最後一張相啦！見到呢位怪獸朋友響到偷懶睇報紙！至於入面嘅野，都係等你有機會時再親身體驗啦！但如果你真係有機會去玩而又未睇過 怪獸公司 呢套電影的話，記得睇返一次先好去玩；因為響玩緊嘅時候，熟悉嘅電影情景將會一幕幕咁響你眼前展現，個感覺係好震撼架！
響出口一出就係一間商店，專賣 怪獸公司 嘅系列商品嘅。有好多 毛毛 同埋 大眼仔 嘅公仔響到。
當我出返去嘅時候，發現 大眼仔 架車泊咗響到啊！後面仲有一粒 大眼仔 造型復活蛋！
再影下啲 Fastpass 發行機先！機上面有一個個能量儲蓄筒，真搞鬼！
講到 Fastpass，我響 東京迪士尼樂園 一整日入面，只係拎咗一張 Fastpass 咋！而呢張 Fastpass 就係用響最後一個，亦係我最愛嘅重點遊樂設施嗰到！如果你有睇哂我咁多篇嘅分享文章的話，你可以諗下仲差邊一個遊樂設施未講過。提示：呢個遊樂設施係香港都有嘅；不過，東京呢個版本就真係好玩過香港多多聲！
沒有留言:
張貼留言