星期一時去完書展，同大家分享過我買咗一本 Epic Mickey 嘅概念畫冊。雖然我未睇哂整本畫冊，但就已經俾入面嘅遊樂場景吸引住。上網睇資料後，知道呢個遊戲係只限 Wii 平台嘅，既然屋企有一部 Wii，就買返黎玩下啦！響唱片鋪搵到呢隻遊戲，仲要係特別收藏版，原先應該大約$500，而家特價$299；真係好好彩，又搵到平貨，所以就即刻買咗落黎，拎返屋企玩啦！
買電子遊戲，最怕就係返到屋企先發現因為系統兼容等嘅問題而玩唔到歷...今次買到返去，放入部 Wii 入面，部機竟然話唔知呢隻係咩碟！玩唔到！其實我好少玩 Wii，所以對佢都唔太清楚。去到玩唔到嘅呢一刻，先記得一樣野...就係美國嘅遊戲要用美國嘅主機先玩到！而屋企呢部係香港機，只能夠玩到日本、台灣嘅遊戲...
雖然玩唔到呢個遊戲，令我有啲沮喪；但我都繼續睇下呢個特別收藏版有咩咁特別。個盒嘅兩邊分別有 米奇 同埋 Oswald The Lucky Rabbit，畫得好靚！
呢盒就係主角，Wii 遊戲光碟！但對於我黎講，佢而家已經變成一位小配角...
收藏版入面仲有一套貼紙，可以俾你貼響 Wii 主機以及搖控器嘅上面。
入面仲有另一隻 Bonus CD，載有幕後花絮片段，以及一啲創作圖。
不過，整盒入面我最鍾意嘅野，就係呢個 米奇 模型公仔啊！好有型！
遊戲入面係設定咗 米奇 用畫筆去做不同嘅任務，所以呢個模型都有一支畫筆附上。
而家就只可以欣賞呢個特別收藏版入面嘅其他物品，但我之後都會諗辦法，務求俾我玩到呢個遊戲，因為啲圖畫實在太吸引啦，令我深信佢必定會係非常好玩！
沒有留言:
張貼留言