第二個響我眼中嘅重點遊樂設施，就係 動物天地 嘅 飛濺山 Splash Mountain 啦！之前都講過呢個遊樂設施有電影 南方之歌 做背景故事，一路玩一路睇故事，好特別。呢個遊樂設施嘅外觀都整得非常有森林色彩，亦會有木船經過。
電影 南方之歌 嘅主角就係兔仔 Br'er Rabbit，佢亦順理成章成為呢個遊樂設施嘅主角。每個招牌上，除咗有 SplashMountain 字樣之外，仲可以見到 Br'er Rabbit 嘅蹤影。
呢個係一個帶有少少刺激元素嘅遊樂設施，所以濕身都在所難免嘅。
入到去等待區，入面原來都幾大，要行好耐先到上船嘅位置。呢到就設計到好似一個森林入面嘅山洞咁，我覺得啲燈令到整個環境好有氣氛啊！
山洞呢到有一隻貓頭鷹，為你簡單講述今次嘅故事。但當然，又係講日文嘅。=_=
慢慢行到入去深處，就會發現山洞就會出現少少變化，我覺得佢地整得好靚啊！
我覺得佢好玩嘅地方，係佢結集咗故事同埋刺激兩種元素，呢種亦係我最愛嘅遊樂設施。特別係有一下，你明明係響室外，突然跌咗一下，一跌完就入咗去室內嘅故事世界，好正！整個旅程大約10分鐘，我都估唔到係會咁耐，不過你玩完之後會覺得呢10分鐘真係好抵！而當中嘅高潮，當然就係由最高位置突然直衝而下啦！亦即係企響出面可以見到嘅嗰一下。入面嘅故事，我唔響到多講啦；因為我想等你有機會時，自己去發掘，會過癮好多架！
一跳就跳到去出口嘅位置啦，呢到係設計到好似 Br'er Rabbit 嘅屋企咁。佢響呢到除咗放咗一幅好大嘅畫之外，仲放咗一啲相框！
無論係礦洞又好，山洞又好，一班 幻想工程師 都能夠整到好有氣氛，佩服！
最後，同樣送上一幅 飛濺山 嘅夜景照片。你鍾意日間定係夜晚多啲呢？
雖然我話我最鍾意嘅，係能夠結集刺激同埋故事兩種元素嘅遊樂設施，但係剩餘兩個嘅重點遊樂設施，都唔係呢一種帶有刺激嘅遊樂設施。想知點解佢地能夠登上重點遊樂設施之位，就記得要留意之後嘅文章啦！不過無論如何，飛濺山 真係一個好正好值得玩嘅遊樂設施，希望未來可以響香港有得玩！
沒有留言:
張貼留言