好啦好啦！終於都到咗最後嘅重點遊樂設施啦！一共有四個，會分兩輪黎寫文章。第一個其實係四個之中我覺得較遜色嘅一個，無其他三個咁正。呢個遊樂設施就係位於 西部樂園 嘅 巨雷山 Big Thunder Mountain。響主題園區內嘅各個位置都可以見到山上有礦車經過。
嘩，睇下個等待區幾大！咁就即係平時要排好耐隊啦！好好彩，我當時只係需要排20分鐘。
咦？礦車？咪即係同 灰熊山谷 一樣？冇錯，都係以礦車做主題，不過就係兩個完全不同嘅故事。灰熊山谷 就講到有一班熊為小鎮帶黎好運，令佢地搵到金礦；灰熊山極速礦車 就係帶我地入山洞掘金，並響期間遇上一眾灰熊。而 巨雷山 嘅故事，就係講到呢座山內嘅礦洞，一早就已經俾人掘走哂啲金，呢到亦慢慢荒廢咗；但有一日，有人突然聽到 巨雷山 內嘅礦車竟然自動行駛！之後佢地將呢到發展成一個旅遊點，俾遊人登上礦車進行神秘嘅冒險之旅！
等待區內都放咗好多同採礦有關嘅佈置，大家可以比較下同香港嘅 灰熊山 有咩唔同。( 有關文章 )
呢到亦有招牌印有 Big Thunder Mining Company 巨雷採礦公司 嘅標誌。
之前講過呢個園區有大型粉飾工作進行緊，亦因為咁，園區唔能夠清楚見到整座 巨雷山。
響等待區內，望出窗口，終於可以望到整座嘅 巨雷山 啦！
黎到上礦車嘅位置，呢到都幾暗。呢張相我之後調較過個光度，原先太暗睇得唔太清楚。
至於出口位都繼續有採礦工具嘅佈置，亦整到好似真係一個礦洞出口咁。
原先我最後想襯就黎關門之前冇咩人玩多次，不過我揀咗玩 飛濺山 先。但因為 飛濺山 個旅程實在太長，最後趕唔切，去到入口時已經關閉，只好影下相啦！
之前都講過，我始終都係覺得香港嘅 灰熊山極速礦車 係比 巨雷山 更加好玩。講刺激就兩個都差唔多，但講到故事，巨雷山 就未能響過程中完整地呈現佢嘅故事；我都係上網睇返先知道個故事，灰熊山 響呢方面係做得更好嘅，所以值得我地自豪！
沒有留言:
張貼留言