基本上，東京迪士尼樂園 的所有遊樂設施我都已經玩過哂，一個日間巡遊、一個節日巡遊、一個夜間巡遊，以及係煙花表演，亦都欣賞過啦。轉眼間，就黎到晚上嘅十點鐘，雖然係好唔捨得，但係夠鐘閉園，點都要走啦...
全日都好熱鬧嘅 世界市集，黎到呢一刻，少咗好多人，靜咗好多。同香港唔同，佢地一閉園就會唔俾賓客再入商店，閉園就真係要你走架啦。不過，如果真係好想繼續買紀念品，園有外一間叫做 BonVoyage 嘅大型商店；店內全部都係兩個主題公園所賣嘅紀念品，開放時間亦去到晚上十一點，所以仲有機會！但有部份商品，就真係園內先會有得買 ( 例如 Duffy 系列只可以響 東京迪士尼海洋 內買到 ) 。
臨走之前，影多幾張相先！( 唔願走，借影相黎拖時間！XD ) 入口嘅 東京迪士尼樂園 招牌著咗燈，就連啲復活蛋都會著燈架！
早上嘅時候掛住衝入去玩，出面嘅佈置都冇影到添。佢地都有 米奇 花圃，仲周圍都有復活節裝飾添！啲兔仔好可愛！
再一次見到遠處嘅 怪獸公司 總部，令我再三回味 怪獸公司迷藏巡遊車 有幾好玩！
好啦！真係要走啦！玩咗成日都幾累！但有如此奇妙嘅一天，真係好開心！期望響未來可以再次踏進 東京迪士尼樂園！
沒有留言:
張貼留言