因為 灰熊山谷 過多兩日就開幕，所以呢幾日都集中講佢。可能大家都已經睇到悶哂... 所以，而家就等我地去返 東京迪士尼樂園 啦！
應承咗大家今次會分享之前未講過嘅園區，今日嘅三篇都係關於三個不同嘅園區！而呢篇文章就係講 動物天地 Critter Country 嘅，呢個園區俾我嘅感覺係... 去郊外小旅行，途中遇上好多不同嘅小動物，個感覺係好優悠嘅。
呢個園區入面有好多郊野小屋，應該就係一班動物嘅屋企啦。
園區入面有好多動物出沒！果然係 動物天地！
其中亦有黎自電影 南方之歌 Song Of The South 嘅 迪士尼朋友。但大家都可能未聽過呢套電影，因為我都未聽過，要上網搵資料先知... 呢套電影都真係好耐，由迪士尼公司響1946年發行上映，加上香港呢邊冇相關嘅 迪士尼朋友 出現，所以唔識都好正常。呢個園區入面有另一個好受歡迎嘅遊樂設施，飛濺山 Splash Mountain，都係以呢套電影做主題嘅，之後會再同大家分享。
呢個園區係整個樂園咁多個園區之中最細嘅一個。我去嘅時候，呢個區同埋旁邊 西部樂園 Westernland 嘅河流區域進行緊粉飾工作，整個園區只係剩返 飛濺山 開放，所以就更加突顯咗佢嘅細小。
園區內總共有兩個遊樂設施，除咗 飛濺山 之外，另外有獨木舟，不過就因為河流需要進行粉飾而暫停開放。
呢個區冇火車站，不過就會有經過火車經過。佢地嘅火車並唔係好似我地香港咁環繞整個樂園 ( 未擴建前 )，而係只穿梭於樂園左邊部份嘅三個園區，動物天地、西部樂園、探險樂園。但係，因為部份路段係環繞正粉飾緊嘅河流，所以鐵路都係暫停開放。
其實整個河流周邊都有好多遊樂設施，佢地全部都暫時關閉。但幸運嘅係，佢地都唔係一啲重點遊樂設施，所以對我黎講都唔係咁大影響；況且，如果要玩埋佢地咁多個的話，可能就唔夠時間玩哂所有野啦！唯一覺得失望嘅係，冇得影相... 因為條河都應該會幾靚... 不過我都冇咩所謂嘅！
沒有留言:
張貼留言