抱歉，又要大家久等，不過呢幾日唔知點解都覺得好累，所以冇咩精力寫文章... 但今日，好榮幸為大家獻上，呢個Blog嘅第三百篇文章！特別開心嘅係，剛好呢一篇將會分享我響 東京迪士尼海洋 入面最愛嘅一個遊樂設施！事不延遲，為大家送上呢個關於 驚魂古塔 Tower Of Terror 嘅故事...
美國海濱 內有一座高塔，散發住濃厚嘅詭異味道... 佢就係著名嘅 高塔酒店 Hightower Hotel；佢曾經都擁有過一段光輝嘅日子，但黎到今日，昔日嘅光芒經已淡化；換上嘅，係一個又一個嘅恐怖傳聞，令呢間荒廢咗嘅酒店變得愈黎愈神秘...
呢啲恐怖嘅傳聞，甚至連各大傳媒都爭相佈導；可想言之，呢間酒店響當時的確係舉足輕重。
日益增加嘅恐怖傳聞加上媒體佈導，激發起一班充滿好奇心嘅訪客進入日久失修嘅酒店入面探險。好可惜，從來都冇人能夠向大家講出酒店內所發生嘅事以及內裡嘅現況；相反，每一個入去探險嘅訪客，只能為呢間酒店增添另一個恐怖傳聞...
為咗避免更多悲劇發生，呢個城市嘅市政府，只好決定封鎖呢間酒店，唔再俾人入去...
曾經令人憧憬到訪入住，再變得令人聞風喪膽嘅 高塔酒店，慢慢亦響人們嘅腦海中被淡忘... 時間慢慢咁過去，酒店外嘅古老大鐘亦如常轉動，雖然已經冇人再記得呢間酒店嘅恐怖，但事實上，酒店內嘅詭異事件依然響暗地裡存在，從來都冇消失過...
事隔十幾年，不同嘅探險者再次出現，希望進入酒店裡面一探究竟。大家都已經唔記得以前發生過嘅事，忽略咗呢間酒店嘅潛在危險；甚至連新嘅市政府都忽略咗，竟然決定解封酒店，舉辦探險團，帶領一眾訪客進入酒店內探索。呢一日，到樣俾好奇心蒙蔽理智嘅我亦黎到呢到，獲得一張 高塔酒店探險通行證。
響酒店周邊設置咗長長嘅等待區，咁就証明咗都有好多同我一樣嘅人，想入去酒店內睇清楚。
究竟酒店入面有啲咩呢？入到去又會發生咩事呢？我不斷幻想，不斷產生不同嘅疑問。同一時間，我靜候時間嘅流逝，期待著通行證上所顯示嘅時間慢慢來臨...
終於，時間到啦，踏入 高塔酒店，首先黎到嘅地方自然就係酒店大堂。估唔到過咗咁多年，大堂內嘅佈置大部份都完整無缺，吊燈依然亮著。置身大堂之中，就好似能夠感受到呢間酒店十幾年前嘅嗰種輝煌，嗰種虛撼嘅場面。
不過，華麗當中，各種精緻嘅傢俱、擺設，卻滿佈塵埃 ，令人開始回想 高塔酒店 嘅另一面...
一棵棵曾經茁壯成長過嘅植木，呢一刻亦已經凋謝，突顯出呢間酒店嘅詭異、悽美...
酒店嘅主人叫做 高塔先生；作為一位收藏家，佢經常會去到世界各地搜羅珍奇異寶。佢去過嘅地方多不勝數；響酒店大堂內，亦可以見到一啲關於佢去探索嘅壁畫。而酒店各處都擺放咗佢拎返嘅收藏品，令 高塔酒店 化身為 高塔博物館...
而詭異嘅事，亦係從呢位主人嘅離奇消失而展開序幕... 唔知由邊日開始，就已經再冇人見過呢位酒店主人，酒店內亦開始傳出一個又一個嘅恐怖傳聞。高塔先生 遺下俾我地嘅唯一線索，就只係一幅相，一幅佢消失前最後影嘅相。
高塔先生 嘅興趣，就係要擁有眾多獨一無二嘅收藏品；事實上，正正就係呢個嗜好令佢招來橫禍。有一次，佢去到非洲，搵到一個細小嘅圖騰木雕像；而呢個木雕，就成為咗佢最後一件收藏品... 原來響呢個木雕入面，存在著一種死亡咒語；當雕像黎到酒店嘅一刻，咒語就已經覆蓋整間酒店。
高塔先生 拎住呢個木雕，去到酒店嘅頂樓，亦即係佢嘅辦公室，將木雕放好響枱上面。突然，木雕發出恐怖嘅笑聲，一閃，咒語啟動；升降機槽隨隨打開，一股魔力將 高塔先生 推入去...完成咗佢第一個任務，咒語並無停落黎，反之繼續向酒店內嘅每一個人落手，直至再無其他目標...
今日我地入到黎呢間被咒語纏繞嘅酒店，就成為咗圖騰木雕嘅新目標；當我地坐響升降機入面，慢慢向上攀升，雕像再一次現身，向我地展現佢邪惡嘅笑容... 升降機繼續攀升，一陣刺眼嘅光芒響一瞬間之中散發出黎；響我地眼前嘅，竟然係 東京迪士尼海洋 嘅樂園景觀；呢一次，會唔會係我最後一次望得到陽光呢？
當我尚未睇清眼前景色嘅時候，升降機毅然墮落，我地再次返返去黑暗之中；雕像終於要出手啦... 升降機反覆攀升、墮落；眾人都發出悽厲嘅尖叫聲，而我卻不斷嘗試感受自己嘅心跳聲...
升降機停咗落黎，升降機門響我地面前打開。原來，經過多年嘅沉睡，魔咒嘅威力竟然退步咗。我地呢一班幸運嘅訪客，從木雕嘅魔爪之中逃走咗出黎... 離開升降機，我地經過一間間酒店內部嘅工作房，最後黎到 高塔酒店 嘅游泳池。
不過，呢個游泳池經已被改裝成一間紀念品店，但原有嘅搞鬼告示就得以保存落黎。
假如你有機會獲得一張 高塔酒店探險通行證 的話，你會選擇入內一探究竟嗎？
沒有留言:
張貼留言