第二個重點遊樂設施同樣位於 神秘島，呢個園區內嘅兩個遊樂設施都係一啲神秘嘅探險之旅。我地剛剛去完海底，黎到 地心探險之旅 Journey To The Center Of The Earth，今次就要去地底啦！
相對起 海底兩萬哩，佢就受歡迎得多啦，平均等待時間都需要45分鐘。所以，響正式玩之前，最重要嘅，當然就要拎 Fastpass 啦！呢到啲機整到好似鍋爐咁。我冇影到呢個遊樂設施嘅嗰張 Fastpass，不過大家放心，我有影到之後兩個重點遊樂設施嗰啲，大家總有機會可以一睹 東京迪士尼渡假區 Fastpass 嘅真面目！嘿嘿！
只係剛剛入去等待區，就已經可以見到火山熔岩嘅蹤影，睇起上黎好熱啊！
呢到就設計成好似一個實驗室咁，有好多實驗用具，一定係用黎研究一啲響地底搵返黎嘅野啦！
我地要坐升降機先可以落到去地底深處嘅月台，之後先可以上車，展開探險之旅。
升降機入面係咁樣嘅，又係有一啲顯示儀；仲有一個通風口，啲脫色嘅效果又係整得好像真！
黎到地底深處，可能因為呢到夠熱啦，啲水都變咗做溫泉，不斷噴煙... 另一方面，呢到睇起上黎係架空嘅，望落去見唔到底，感覺上好似仲有好深咁...
黎到地底，又邊有可能會興建到完整嘅架構，周圍都只係簡單用鐵柱支撐住。
玩完之後，出口呢到係一條迴型嘅樓梯，周圍都係鐵枝；我真係覺得啲鏽漬整得好正！
我以前睇過一套同呢個遊樂設施同名嘅電影，玩嘅時候對某啲場景都有啲印象；但最深刻嘅，就係我地要逃離險境，之後突然急衝，衝咗出戶外，好大風，好過癮！不過我最愛嘅遊樂設施都唔係呢個，咁究竟係咩呢？得返兩個啫，下次分享時咪會知道囉！XD
沒有留言:
張貼留言