首次入住迪士尼酒店, 在酒店中渡過生日!

今日啲文章都係文字多過圖片，希望大家見諒，聽日講返 東京迪士尼海洋 嘅時候就唔會咁架啦！講返呢篇文章先，呢篇文章，可以話係一個預告，同時記錄低我呢一刻嘅興奮心情！

而家時間倒流，返返去東京之旅出發之前！其實之前都同大家分享過呢件事架啦...  為咗慶祝我考完公開試，所以媽媽考慮過響 東京迪士尼渡假區 嘅嗰幾日入住迪士尼酒店。後來因為價錢太貴，以及太難訂房，所以佢就打消咗呢一個念頭。但換來嘅係，佢應承我，今年我生日時會同我去住一晚 香港迪士尼樂園渡假區 嘅酒店啊！由細到大都好鍾意迪士尼，先後亦有幸到訪過不同嘅迪士尼渡假區，不過就從未住過迪士尼酒店。今年生日能夠有機會入住迪士尼酒店，真係特別開心，特別興奮啊！

亦因為咁，我響五月 奇妙處處通 續証時，亦特別揀咗白金卡會籍，可以享受更多酒店生日優惠！前排我就響網上訂咗房，之後再打電話訂埋晚餐自助餐啦！( 當晚仲要有 廚師米奇 出黎影相！) 相信今次必定會係一個史無前例嘅奇妙體驗，好期待啊！

其實今年生日對我黎講仲有特別意義，因為我今年就18歲，大個仔啦！( 雖然我唔想大個仔 =_= ) 9月就要變成一個真正嘅成年人，真係有啲感慨...  雖然係咁，但我嘅內心依然會保持童真架！XD