東京迪士尼海洋 身為 Duffy 聖地，咁鍾意 Duffy 嘅我去得朝聖，又點會唔買返隻返黎呢？咁 香港迪士尼樂園 同埋 東京迪士尼海洋 所出品嘅 Duffy，究竟有咩唔同呢？就等我比較一下啦！兩隻都係 大Duffy，左邊嘅係 香港迪士尼樂園 Duffy，右邊就係 東京迪士尼海洋 Duffy。大細方面，東京迪士尼海洋 嗰隻係大隻少少嘅，不過真係好少，差異不大。
當然都會有條尾啦，亦唔少得 Duffy 嘅標記，屁股上的 米奇 頭型圖案。
至於另一個標記，腳印，左邊嘅都係香港 Duffy，右邊就係東京 Duffy；圖案就當然唔會有分別，不過仔細啲睇一睇，東京 Duffy 個圖案係深色少少嘅。
至於招牌方面，因為東京呢邊係獨立推出 Duffy 嘅相關產品，所以係寫返 Tokyo DisneySea；香港迪士尼樂園 出品嘅 Duffy 商品就係跟隨美國嘅，所以招牌就係寫 Disney Parks。
正常黎講，響 東京迪士尼海洋 買嘅 Duffy 小熊公仔，理應同 香港迪士尼樂園 嘅完全冇分別。因為兩邊嘅熊仔都係出產自同一工廠，外型係一樣嘅，只係招牌上所寫嘅有唔同。咁點解今次對比之下又會有少少差異呢？咁係因為我今次對比並唔公平。我原本嗰隻香港 Duffy 係響2010聖誕節買嘅，事隔一年幾，兩隻 Duffy 應該唔屬於同一批次；所以外型上有少少差異唔係咩奇怪嘅事，我只係無無聊聊比較一下啫。
另外，有買過 Duffy 公仔嘅朋友應該會知道，無論係大隻定細隻，都會附送一本故事冊。咁香港嗰本故事冊同東京嘅，又有咩唔同呢？而家繼續同大家分享。
大細方面，兩本都係屬於 大Duffy 嘅故事冊，兩者大細係一樣嘅；同時亦係有膠套裝住。至於張圖，東京嗰幅可以見到 米奇 成個身；而標誌方面，東京版本係淺色啲同埋啲字疏少少。最後有一個小差別，就係東京幅圖入面嘅 Duffy 頸上有掛飾，香港版本就冇；其實呢條掛飾，響東京呢邊黎講，係有特別意義架！我遲啲會再介紹一下佢嘅含意。差啲講漏咗，就係紙張嘅質地；香港嗰本係用咗膠面紙，而東京嗰本嘅質地就好似人地嗰啲卡紙。
到入面嘅內容啦，東京版本係寫日文嘅，而唔係英文；第一張圖同香港版本一樣，可以睇返香港嘅英文故事，所以問題不大。但到第二張圖，東京版就已經同香港版唔同啦，我再一次完全睇唔明，唯有玩看圖估故事。=_=
而背面嘅不同之處主要都係在於 Duffy 嘅造型上，除咗掛飾之外，連件水手裝都有少少唔同架。至於一啲字眼上、標誌上、印記上嘅差異，我唔逐樣講啦，大家可以睇返下面張相簡單比較一下。
最後，等佢地兩個一齊做返個招牌動作，撒下嬌先！
來自 東京迪士尼海洋 嘅 大Duffy，加入咗我地嘅 Duffy 家族，一定會同其他 Duffy 和睦共處嘅！佢地而家每一日都開開心心咁生活，開開心心咁玩，好溫馨架！
沒有留言:
張貼留言